Mehmet Pehlivan polis nəzarətinə verilməklə şərti azadlığa buraxıldı.

İstanbul Böyükşəhər Bələdiyyəsinin həbsdə olan sədri Əkrəm İmamoğlunun vəkili Mehmet Pehlivan da saxlanılıb.

Məlumata görə, onun barəsində "Cinayət yolu ilə əldə edilmiş əmlak dəyərlərinin leqallaşdırılması" maddəsi üzrə saxlanılma qərarı verilib.

Həbs qərarından sonra İmamoğlunun “X” hesabından verilən açıqlamada "Qadağaçı zehniyyətdə yalanın və böhtanın sonu yoxdur. Bu dəfə vəkilim Mehmet Pehlivan uydurma əsaslarla saxlanılıb" ifadəsi yer alır.

“Demokratiyaya qarşı çevriliş azmış kimi, bu çevrilişin qurbanlarının özlərini müdafiə etməsinə dözə bilmirlər. Demokratiyaya qarşı çevrilişin üstünə qanuni çevriliş də əlavə etmək istəyirlər. Bir ovuc səriştəsiz adamın ölkəmizə vurduğu şər daha da böyüyür. Vəkilimi dərhal azad edin”, - İmamoğlu yazıb.

İmamoğlu martın 18-də universitet diplomunun ləğv edilməsindən bir gün sonra saxlanılıb.

O, martın 23-də “korrupsiya” istintaqı çərçivəsində həbs edilib. Bütün bu proses son həftələrdə İstanbul Böyükşəhər Bələdiyyə Başçılığına qarşı açılan araşdırmalardan sonra və CHP-nin prezidentliyə namizədliyi üçün ilkin seçkilər öncəsi baş verib.

Araşdırmaların əvvəlində prezident Rəcəb Tayyib Ərdoğan, "Onlar da ən böyük turpun torbada olduğunu çox yaxşı bilirlər. Narahatlıqlarının səbəbi budur" demişdi.

İmamoğlu 2019-cu ilin martından İstanbulun bələdiyyə sədri vəzifəsində çalışır. O, yenidən namizədliyi irəli sürüləcəyi təqdirdə Türkiyənin hazırkı prezidenti Rəcəb Tayyib Ərdoğanın əsas rəqibi hesab olunur. Türkiyədə prezident seçkiləri 2028-ci ilə təyin edilib.