İstanbul Böyükşəhər Bələdiyyəsinin (İBB) sədri Əkrəm İmamoğlu barəsində "ictimai işlərə rəhbərlik edən şəxslərdən birini hədəfə alması" əsası ilə araşdırma başlanıldığı bildirilir.

İstanbul Baş Prokurorluğunun yaydığı açıqlamada deyilir ki, Əkrəm İmamoğlu yanvarın 27-də keçirdiyi mətbuat konfransından sonra ona qarşı Türkiyə Cəza Məcəlləsinin 277 və 288-ci maddələri ilə iş üzrə istintaq başladılıb.

"Bizə qarşı edilən hər haqsızlığı, qanunsuzluğu türk milləti ilə paylaşacağıq. Biz heç kimin hüququnu pozmayacağıq, haqqımızın tapdalanmasına da icazə verməyəcəyik. Sözümü bitirməmiş mənim barəmdə araşdırma başladılır. Haqsız müdaxilələrə cavab vermək, ədalətli məhkəməyə təsir etmək deyil. Əksinə, qanunun müstəqilliyini müdafiə etməkdir. Sənədlərlə açıqladığım qeyri-qanuni fəaliyyətlərin tam sürətlə araşdırılmasını gözləyirəm. Bu qanunsuz əməllər və əməliyyatlar barədə məlumat verən mətbu orqanlar və bunları paylaşan vətəndaşlarla bağlı araşdırmaların başlanması da senzuranın zirvəsidir", – Əkrəm İmamoğlu barəsində araşdırma başladılmasını şərh edərkən deyib.