ABŞ-da təhsil alan türkiyəli tələbə Fələstinə dəstək olduğuna görə saxlanılıb, vizası ləğv edilib.

Tafts Universitetində doktorantura pilləsində təhsil alan 30 yaşlı Rumeysa Öztürk martın 25-də iftar yeməyinə gedərkən yolda mülki geyimli immiqrasiya xidməti işçiləri tərəfindən saxlanılıb.

Martın 26-da Vətənin Təhlükəsizliyi Departamenti Öztürkün “HƏMAS”a “dəstək olan fəaliyyətlərə məşğul olduğu üçün” həbs olunduğunu deyib, lakin hansı fəaliyyətlərdən söhbət getdiyi açıqlanmayıb.

Öztürk ötən ilin mart ayında Tafts universitetinin virtual qəzetində digər tələbələrlə birlikdə köşə yazısı dərc edib. Yazıda universitet İsrail şirkətləri ilə əməkdaşlıqdan imtina etməməsinə görə tənqid olunur.

Öztürkün həbsi ilə bağlı suala cavab verən ABŞ Dövlət katibi Marko Rubio tələbənin sadəcə köşə yazısına görə saxlanılması iddiasını rədd edib:

“ABŞ-a gəlmək və tələbə olmaq məqsədilə viza üçün müraciət etsəniz və desəniz ki, ABŞ-a gəlməyinizin səbəbi olaraq universitetləri vandalizmə məruz qoymaq, digər tələbələri təqib etmək, binaları ələ keçirmək, qalmaqal yaratmaq kimi işlərlə məşğul olan hərəkatlarda iştirak etmək istəyirsiniz, biz sizə viza verməyəcəyik."

Rubio əlavə edib ki, Öztürk də daxil olmaqla 300-dən çox tələbənin vizası ləğv edilib.

Tələbənin qardaşı Asim Öztürk bacısının Fələstin məsələsi ilə bağlı “hər hansı təxribatçı və ya aqressiv hərəkətə yol vermədən ifadə azadlığı çərçivəsində fikrini ifadə etdiyini” bildirib.

“Görünür, o, Trampın hakimiyyəti altında cadugər ovuna çıxan ICE-nin (İmmiqrasiya və Gömrük İcrası - red.) Fələstini dəstəkləyənlərə qarşı fəaliyyətinə məruz qalıb”, -o, Anadolu Agentliyinə deyib.

Türkiyə xarici işlər nazirliyi Öztürkün məsələsini “yaxından izlədiklərini” və onu lazımi hüquqi yardımla təmin etdiklərini bildirib.

ABŞ-da artıq bir neçə həftədir ki, tələbə və başqa leqal yaşayış icazəsi olan şəxslər “HƏMAS tərəfdarı” adı ilə həbs olunur və deportasiya olunmaq təhlükəsi ilə üzləşir.