Mayın 16-da Albaniyanın paytaxtı Tiranada Azərbaycan Respublikasının Prezidenti İlham Əliyev Avropa İttifaqı Şurasının Prezidenti Antonio Koşta və Avropa Komissiyasının Prezidenti Ursula fon der Lyayen ilə görüşüb.

Görüş zamanı Avropa İttifaqı rəhbərləri Azərbaycanın qurum üçün önəmli və etibarlı tərəfdaş olduğunu vurğulayıblar. Onlar xüsusilə Avropanın enerji böhranı ilə üzləşdiyi dövrdə Azərbaycanın göstərdiyi dəstəyi yüksək qiymətləndiriblər.

Tərəflər, həmçinin Azərbaycanın Mərkəzi Asiya regionu ilə əlaqələri və Orta Dəhlizdəki strateji roluna diqqət çəkiblər. Azərbaycanın bölgədə və onun hüdudlarından kənarda sülh və sabitlik üçün dialoq platforması kimi çıxış etməsi də məmnunluqla qeyd olunub.

Prezident İlham Əliyev çıxışında Azərbaycanın Avropa İttifaqı ilə əlaqələrə böyük önəm verdiyini bildirib və ölkəmizin Avropanın enerji təhlükəsizliyində oynadığı rolu qeyd edib. O, Azərbaycanın bu gün Avropanın 10, o cümlədən Aİ-nin 8 üzv ölkəsinin enerji təminatında mühüm rol oynadığını diqqətə çatdırıb.

Dövlət başçısı, həmçinin Orta Dəhlizin inkişafı üçün ölkədə həyata keçirilən infrastruktur layihələri və yatırılan investisiyalar barədə məlumat verib. Dəhliz vasitəsilə yük daşımalarının həcminin artdığını bildirib.

Görüşdə Azərbaycan, Qazaxıstan və Özbəkistan prezidentləri səviyyəsində imzalanmış, Xəzər dənizi vasitəsilə Mərkəzi Asiyanın bərpaolunan enerji resurslarının ötürülməsini nəzərdə tutan strateji tərəfdaşlıq sazişi və Qara dənizin dibi ilə enerji ixracına dair layihələr müzakirə olunub. Bu sahədə əməkdaşlığın geniş imkanlar yaratdığı qeyd edilib.

Eyni zamanda Cənub Qaz Dəhlizi Məşvərət Şurası çərçivəsində aparılan əməkdaşlığa da toxunulub və bu istiqamətdə də geniş perspektivlərin mövcud olduğu vurğulanıb.

Görüşdə qarşılıqlı maraq doğuran digər məsələlər ətrafında da fikir mübadiləsi aparılıb.