Roma Papası XIV Leo vəzifəsinin rəsmi icrasına başlayıb. Müqəddəs Taxt-Tacın mətbuat xidmətinin yaydığı məlumata görə, pontifikat dövrünün başlanğıcını simvolizə edən qədim mərasimdə Papa “balıqçı üzüyü” və xaçlarla bəzədilmiş yun lent – pallium ilə təltif olunub.

XIV Leo-nun inauqurasiya messasına o özü şəxsən rəhbərlik edib. Mərasim papalı xütbə, “Səmavi Kraliça” duası və mübarək dua ilə yekunlaşıb. Müqəddəs Taxt-Tacın açıqlamasına əsasən, Vatikan meydanında keçirilən mərasimə 150 minə yaxın inanan toplaşıb. Həmçinin tədbirdə 150-dən çox ölkənin nümayəndə heyətləri, monarx ailələrinin üzvləri və müxtəlif dini konfessiyaların təmsilçiləri iştirak ediblər. Xristian konfessiyaları ilə yanaşı, müsəlman, yəhudi, hindu və buddist icmaları da mərasimdə təmsil olunub.

Cari ilin 14 sentyabrında 70 yaşını tamamlayacaq Papa XIV Leo, pontifikat dövründə rəqəmsal inqilab fonunda sosial ədalət və qlobal münaqişələrin həllinin əsas prioritetlərdən olacağını bəyan edib.

Xütbəsində kilsə birliyinə çağırış edən Papa, bu birliyi sülh və birgəyaşayışın əsası kimi dəyərləndirib: “Bu gün də biz çoxlu ixtilaflara, nifrətə, zorakılığa, stereotiplərə, insanlara qarşı qorxuya, Yer kürəsinin resurslarını istismar edən və kasıbları kənarda qoyan iqtisadi modellərin doğurduğu yaralara şahidlik edirik.”

Qeyd edək ki, mərasimdə Azərbaycanı Milli Məclisin sədri Sahibə Qafarova təmsil edib.