Polşa gömrük orqanları Azərbaycana göndərilən və təyyarələr üçün nəzərdə tutulan təkərləri müsadirə edib. Polşa Milli Vergi Administrasiyasının mayın 19-da yaydığı məlumatda bildirilib ki, müsadirə olunan təkərlərin ümumi çəkisi 5 ton olub və onlar İspaniyadan göndərilib.

Sənədlərdə təkərlərin avtomobil və avtobuslar üçün nəzərdə tutulduğu göstərilsə də, gömrük yoxlaması zamanı onların “Boeing” təyyarələrinə aid olduğu müəyyən edilib. Təkərlər Belarusdan keçməklə Polşa ərazisinə daxil olduqları zaman sərhəd gömrükçüləri tərəfindən aşkarlanaraq saxlanılıb.

Hadisə ilə bağlı cinayət işi açılıb. Məlumata görə, bu hadisə Rusiya və Belarusa tətbiq olunan beynəlxalq sanksiyalar kontekstində baş verib. Qərb ölkələri Rusiyanın Ukraynaya qarşı müharibəsinə cavab olaraq bu ölkələrə qarşı bir sıra sanksiyalar, o cümlədən təyyarələr və onların ehtiyat hissələrinin satışına qadağa tətbiq edib.

Ehtiyat hissələrinin çatışmazlığı səbəbindən Rusiya aviaşirkətləri bir sıra təyyarələri istismardan çıxararaq onların hissələrindən ehtiyat kimi istifadə etməyə məcbur qalır. Polşa rəsmiləri ehtimal edir ki, saxlanılan təyyarə təkərləri bu məqsədlə Rusiya və ya Belarus vasitəsilə daşınıb. Hazırda araşdırmalar davam edir.