Türkiyə Prezidenti Rəcəb Tayyib Ərdoğan növbəti prezident seçkilərində iştirak etməyəcəyini bəyan edib. O, bu barədə Macarıstan səfərindən qayıdarkən təyyarədə jurnalistlərin suallarını cavablandırarkən danışıb.

“Yenidən seçilmək və ya yenidən namizəd olmaq fikrim yoxdur. Bizim narahatçılığımız ondan ibarətdir ki, atacağımız addımlarla ölkəmizin nüfuzunu necə yüksəldə bilərik,” – deyə Ərdoğan bildirib.

Prezident Türkiyənin iqtisadi və siyasi cəhətdən güclü bir mərhələdən keçdiyini vurğulayıb: “Allaha şükürlər olsun ki, Türkiyənin milli gəliri indi güclü mövqeyə çatıb. Türkiyə hazırda tarixinin ən sabit və güclü dövrünü yaşayır. Biz tam birlik ruhu ilə terrora son qoymaq ərəfəsindəyik.”

Ərdoğan, həmçinin, inflyasiyaya qarşı mübarizənin uğurla davam etdiyini və xarici siyasətdə Türkiyənin ulduzunun parladığını qeyd edib. O, Xalq Alyansının ölkənin sabitliyinə zərər vuracaq heç bir təşəbbüsə imkan verməyəcəyini də vurğulayıb.