Azərbaycan Respublikası xarici işlər nazirinin müavini, COP29 üzrə başdanışıqçı Yalçın Rəfiyevin rəhbərlik etdiyi nümayəndə heyəti 23 may 2025-ci il tarixində Meksika Birləşmiş Ştatlarına səfər edib.

Səfər çərçivəsində Meksika Xarici İşlər Nazirliyinin Çoxtərəfli Əlaqələr və İnsan Hüquqları üzrə nazir müavini Enrike Oçoa Martinez, Meksikanın iqlim məsələləri üzrə baş danışıqçısı Kamila Zepeda və Beynəlxalq Əlaqələr üzrə Meksika Şurasında (COMEXI) bir sıra yüksək səviyyəli görüşlər baş tutub.

Nazir müavini Enrike Oçoa Martinez ilə görüş zamanı Azərbaycan və Meksika arasında beynəlxalq təşkilatlar və çoxtərəfli platformalar çərçivəsində mövcud olan əməkdaşlıqdan məmnunluq ifadə olunub. Yalçın Rəfiyev meksikalı həmkarına Azərbaycanın xarici siyasət prioritetləri, Azərbaycan-Ermənistan münasibətlərinin normallaşması istiqamətində atılan addımlar və Azərbaycanın ev sahibliyi ilə keçiriləcək çoxtərəfli tədbirlər barədə ətraflı məlumat verib.

Görüşlərdə, həmçinin iqlim dəyişikliyi ilə mübarizə sahəsində əməkdaşlıq məsələləri, COP29 çərçivəsində Azərbaycanın gördüyü işlər və qarşılıqlı dəstək imkanları müzakirə olunub. Kamila Zepeda ilə görüşdə Azərbaycanın COP29-a sədrliyi dövründə əldə etdiyi nailiyyətlər xüsusi qeyd olunub və bu istiqamətdəki səyləri yüksək qiymətləndirilib.

Beynəlxalq Əlaqələr üzrə Meksika Şurası – COMEXI-də keçirilən müzakirələrdə isə 2020-ci il Vətən müharibəsindən sonra Cənubi Qafqazda yaranmış yeni reallıqlar, Azərbaycanın regional və beynəlxalq miqyasda artan rolu, çoxşaxəli xarici siyasəti və beynəlxalq təşkilatlarda təşəbbüsləri ətrafında fikir mübadiləsi aparılıb.

Azərbaycanın COP29 sədrliyi çərçivəsində apardığı danışıqlar və əldə etdiyi nəticələr həm rəsmi dairələr, həm də ekspert ictimaiyyəti tərəfindən yüksək dəyərləndirilib.