Belarus hökuməti informasiya sahəsində nəzarəti daha da sərtləşdirir. Belarus İnformasiya Nazirliyinin rəhbəri Marat Markov bildirib ki, ölkədə təxminən 7 min informasiya resursu “ekstremist” kimi tanınıb.

Nazirin sözlərinə görə, ümumilikdə 18 min resursun fəaliyyəti məhdudlaşdırılıb. O, qeyd edib ki, təkcə 2024-cü ildə 3 min 150-dən çox resurs bloklanıb, bu da ötən illə müqayisədə artım deməkdir. “2025-ci ilin ilk beş ayında artıq bu göstəriciyə çatmışıq”, – deyə Markov vurğulayıb.

Müstəqil media da hədəfdə

Belarus hakimiyyəti uzun müddətdir müstəqil medianı və hökuməti tənqid edən informasiya mənbələrini “ekstremist materiallar” və ya “ekstremist qruplaşmalar” adı altında siyahıya salır. Bu çərçivədə, “Azadlıq” radiosunun Belarus xidmətinin ofisi də 2021-ci ilin iyulunda təhlükəsizlik qüvvələri tərəfindən “ələ keçirilib”. Bir neçə jurnalist saxlanılıb, lakin daha sonra zaminə buraxılıb.

Sosial media da “ekstremist” sayılır

2021-ci ilin dekabrında “Azadlıq” radiosunun Belarus xidmətinin sosial şəbəkə səhifələri də “ekstremist material” elan olunub. Həmin ayın 23-də isə Daxili İşlər Nazirliyi bu medianın onlayn resurslarını bütövlükdə “ekstremist qruplaşma” kimi tanıyıb.

Təzyiqlər beynəlxalq narahatlıq doğurur

Beynəlxalq insan haqları təşkilatları Belarusda media azadlığına qarşı bu cür kütləvi hücumları pisləyir və ölkədə ifade azadlığının sistematik şəkildə məhdudlaşdırıldığını bildirirlər.