Ermənistan müxalifəti Baş nazir Nikol Paşinyana qarşı impiçment prosesinə başlayıb. Parlamentdə təmsil olunan “Mənim şərəfim var” fraksiyası bu təşəbbüslə çıxış edib və Baş nazir postuna Masis şəhərinin meri David Hambardzumyanın namizədliyini irəli sürmək niyyətindədir.

Məlumatı “TASS” agentliyi fraksiyanın rəsmi bəyanatına istinadən yayıb. Sabiq Prezident Serj Sarkisyana yaxınlığı ilə tanınan fraksiya hazırda parlamentdə cəmi 6 mandatla təmsil olunur. Ancaq impiçment təşəbbüsünün parlamentin gündəliyinə daxil edilməsi üçün ən azı 36 deputatın dəstəyinə ehtiyac var.

Robert Köçəryanın rəhbərlik etdiyi müxalif “Ermənistan” fraksiyası isə bəyan edib ki, ilkin olaraq 8 səs toplandığı halda, təşəbbüsə 28 imza ilə dəstək verməyə hazırdır.

Qeyd edək ki, parlamentdə Paşinyanın rəhbərlik etdiyi “Mülki müqavilə” fraksiyasından ayrılmış 2 deputat da mövcuddur. Lakin onlar impiçment sənədinə imza atmayacaqlarını bildiriblər.

Təklif gündəliyə daxil olacağı halda belə, Paşinyanın vəzifədən uzaqlaşdırılması üçün ümumilikdə 54 səsin toplanması tələb olunur. Hazırkı vəziyyətə görə, bu rəqəmə çatmaq müxalifət üçün asan görünmür.