Prezident İlham Əliyev bildirib ki, Ermənistan azərbaycanlıların öz dədə-baba torpaqlarına qayıtmaq hüququna hörmətlə yanaşmalıdır. Dövlət başçısı bu fikirləri “Qanunun aliliyinin gücləndirilməsi: ombudsmanların və milli insan hüquqları təsisatlarının rolu” mövzusunda keçirilən Ombudsmanların Beynəlxalq Simpoziumunun iştirakçılarına ünvanladığı müraciətdə səsləndirib.

“Bu, bölgədə sülhün, barışığın və insan hüquqlarının bərqərar olması üçün vacib şərtdir”, – deyə Prezident bəyan edib.

Müraciətdə qeyd olunub ki, simpozium çərçivəsində qaçqınların hüquqları ilə bağlı məsələlərin də müzakirəsi nəzərdə tutulur. Prezident bu kontekstdə tarixi ədalətsizliyə diqqət çəkərək bildirib:

“Keçən əsrin əvvəllərindən başlayaraq Qərbi Azərbaycandan – Ermənistan ərazisindən yüzminlərlə azərbaycanlı zorla çıxarılıb və etnik təmizləməyə məruz qalıb. Bu dəhşətli deportasiyalardan sonra Ermənistan ərazisində bir nəfər belə azərbaycanlı qalmayıb. Eyni zamanda, bu ərazilərdə xalqımızın qədim tarixi-mədəni, dini-mənəvi irsi – abidələr, məscidlər, qəbiristanlıqlar məhv edilib.”

Dövlət başçısı vurğulayıb ki, tarixi ədalət həmin insanların öz vətənlərinə dinc və təhlükəsiz şəkildə qayıtmasının təmin olunmasını tələb edir.

Xatırladaq ki, Bakı şəhərində keçirilən simpoziumda dünyanın müxtəlif ölkələrindən ombudsmanlar və insan hüquqları üzrə ekspertlər iştirak edirlər.