İyunun 26-da axşam saatlarında Bakının Yasamal rayonu ərazisində yerləşən Cəfər Cabbarlı adına “Azərbaycanfilm” kinostudiyasında baş verən partlayışla bağlı Baş Prokurorluqda araşdırma aparılır. Bu barədə qurumun mətbuat xidməti məlumat yayıb.

Bildirilib ki, saat 23:00 radələrində kinostudiyanın ərazisində yerləşən pirotexniki vasitələrin saxlandığı anbarda yanğınla müşayiət olunan güclü partlayış baş verib. Partlayış nəticəsində birmərtəbəli tikili tamamilə dağılıb, kinostudiyanın inzibati binası və ətrafdakı yaşayış binasının bir neçə mənzilinin pəncərələrinə ziyan dəyib.

Hadisə yerinə dərhal Baş Prokurorluğun Kriminalistika və informasiya texnologiyaları idarəsinin əməkdaşları cəlb olunub. Fövqəladə Hallar Nazirliyi və Ədliyyə Nazirliyinin Məhkəmə Ekspertiza Mərkəzinin mütəxəssislərinin iştirakı ilə hadisə yerinə baxış keçirilib, bir sıra ekspertizalar təyin olunub və təxirəsalınmaz prosessual hərəkətlər həyata keçirilib.

İlkin araşdırmalara əsasən, partlayış film çəkilişlərində istifadə edilən pirotexniki vasitələrin saxlandığı anbarın yanması nəticəsində baş verib. Xoşbəxtlikdən, hadisə zamanı xəsarət alan olmayıb.

Hazırda fakt üzrə araşdırmalar davam etdirilir. Baş Prokurorluq hadisənin səbəbləri və digər detallar barədə əlavə məlumatların ictimaiyyətə təqdim olunacağını bildirib.