İranın yeni seçilmiş prezidenti Məsud Pezeşkian ana dilində təhsil və milli haqlar məsələsində cəsarətli çıxışı ilə gündəmə gəlib. O, İran Azərbaycanında yaşayan türklərin hüquqlarını müdafiə edərək, onların ana dilində təhsil tələbini haqlı adlandırıb.

Pezeşkian çıxışında bildirib:
“Bizim ölkədə ana dilində təhsil problemi var. Bunu danmaq doğru deyil. İran Azərbaycanında özünü türk adlandıranlara qəzəblənmək yersizdir. Onların ana dili türk dilidir, etnik kimlikləri də türkdür. Bu insanları başqa adlarla tanıtmaq qondarma və qəbuledilməzdir”.

O, ana dilində təhsilin yalnız daxili məsələ deyil, İranın beynəlxalq öhdəliyi olduğunu da vurğulayıb:
“Ana dilində təhsil İranın həm milli, həm də beynəlxalq öhdəliyidir. Xüsusilə də türk dilində təhsil məsələsinə həssas yanaşmaq lazımdır. Çünki bu dil İranın ayrılmaz parçası olan milyonlarla insanın ana dilidir”.

Pezeşkian həmçinin, Azərbaycanın dahi şairi Məhəmmədhüseyn Şəhriyarın türk dilində yaratdığı əsərlərə diqqət çəkərək deyib:
“Türk dili Şəhriyarın danışdığı və yazdığı dildir. Bu dildə şeir deyənlərə qəzəblənmək məntiqsizdir. Şəhriyar İran tarixinin ən dahi şəxsiyyətlərindən biridir”.

Prezident vurğulayıb ki, ölkədəki bütün etnik qrupların dilləri - kürd, türk, ərəb və digərləri - İranın milli sərvətidir:
“Son 12 günlük müharibə göstərdi ki, İranın ən böyük sərvəti onun milli birliyidir. İnsanların öz ana dilində özünü ifadə etməsi onların təbii haqqıdır”.

Pezeşkianın bu çıxışı cəmiyyətdə geniş rezonans doğurub və onun türklərin haqlarına açıq dəstəyi müsbət qarşılanıb.