USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Müsavat Partiyasına Rusiya əleyhinə aksiya keçirməyə icazə verilmədi
Bakı Şəhər İcra Hakimiyyəti potensial təhlükə və ictimai maraqları əsas gətirib
Bakı Şəhər İcra Hakimiyyəti (BŞİH) Müsavat Partiyasının Rusiyanın Azərbaycandakı səfirliyi qarşısında piket keçirməsinə icazə verməyib.
Partiya iyulun 8-də səfirlik binası qarşısında aksiya keçirmək məqsədilə BŞİH-ə rəsmi müraciət etmişdi. Lakin meriya bu müraciəti rədd edib. Rəsmi cavabda qeyd olunub ki, iyunun 27-də Rusiyanın Yekaterinburq şəhərində baş vermiş insidentlə bağlı Azərbaycan hökuməti artıq qarşı tərəfə rəsmi etirazını bildirib və müvafiq addımlar atılıb.
İcra Hakimiyyəti qərarını “Sərbəst toplaşmaq azadlığı haqqında” qanunun 7-ci maddəsinin I hissəsinə əsaslandırıb. Həmin maddəyə görə, sərbəst toplaşmaq azadlığı yalnız milli və ictimai təhlükəsizlik, iğtişaşların və cinayətlərin qarşısının alınması, digər şəxslərin hüquqlarının qorunması kimi hallarda məhdudlaşdırıla bilər.
Meriyanın açıqlamasında piketin keçirilməsinin potensial təhlükə və ictimai maraqlara zidd olduğu vurğulanıb.
Xatırladaq ki, iyunun 27-də Yekaterinburqda rus hüquq-mühafizə orqanları azərbaycanlıların yaşadığı evlərə reyd keçirib. Nəticədə iki nəfər – 60 yaşlı Hüseyn Səfərov və 55 yaşlı Ziyəddin Səfərov həlak olub, bir neçə nəfər yaralanıb, doqquz nəfər isə saxlanılıb.
Hadisədən sonra Azərbaycan Xarici İşlər Nazirliyi Rusiya tərəfinə rəsmi nota göndərərək təxirəsalınmaz araşdırma aparılmasını və günahkar şəxslərin məsuliyyətə cəlb olunmasını tələb edib. Rəsmi Bakı bununla yanaşı, bir sıra mədəni tədbirləri təxirə salıb və Rusiya rəsmilərinin ölkəyə səfərlərini ləğv edib.
Bundan əlavə, bu ilin fevralında fəaliyyəti dayandırılmış “Rossiya Seqodnya” agentliyinə məxsus “Sputnik Azərbaycan”ın ofisində əməliyyat aparılıb və 7 nəfər saxlanılıb. Onlara qarşı dələduzluq, qanunsuz sahibkarlıq və külli miqdarda gəlir əldə etmə maddələri ilə cinayət işi açılıb. Rusiya mətbuatı isə saxlanılanların sayının 10 nəfər olduğunu və aralarında turistlərlə iş adamlarının da olduğunu yazıb.
