USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
AİHM: MH17 təyyarəsini Rusiya vurub, 298 nəfərin ölümünə görə məsuliyyət daşıyır
Avropa İnsan Hüquqları Məhkəməsi (AİHM) iyulun 9-da Rusiyaya qarşı iki mühüm qərar qəbul edib. Məhkəmə 2014-cü ildə Ukraynanın şərqində vurulan Malayziya Hava Yollarına məxsus MH17 reysinə görə Rusiyanı məsuliyyətli hesab edib. Qərarda bildirilir ki, 298 sərnişinin ölümü ilə nəticələnən bu faciəyə görə ilk dəfədir ki, rəsmi Moskva beynəlxalq səviyyədə günahkar elan olunur.
AİHM-in qərarında vurğulanır ki, təqdim olunan sübutlar raketin qəsdən buraxıldığını və onu atmış şəxslərin təyyarədəki bütün sərnişinlərin öləcəyini bildiklərini sübut edir. Məhkəmə qeyd edir ki, bu hadisə beynəlxalq hüququn ciddi şəkildə pozulmasıdır.
Bununla yanaşı, AİHM Rusiyanın 2022-ci ilin fevralında Ukraynaya genişmiqyaslı hərbi təcavüzü ilə də beynəlxalq hüququ pozduğunu açıqlayıb. Məhkəmənin qərarına əsasən, bu addımlar Rusiyanın Avropa İnsan Hüquqları Konvensiyasına zidd hərəkət etdiyini sübut edir.
Ukrayna və Hollandiya tərəfindən AİHM-də Rusiyaya qarşı ümumilikdə dörd iddia qaldırılıb. Bu iddialardan biri də işğal olunmuş ərazilərdən ukraynalı uşaqların qanunsuz şəkildə Rusiya ərazisinə aparılması ilə bağlıdır.
Rusiya, Ukraynaya qarşı müharibənin başlanmasından sonra Avropa İnsan Hüquqları Məhkəməsinin qərarlarını tanımadığını bəyan edib.
