İyulun 17-də Azərbaycan Respublikasının Prezidenti İlham Əliyev və Türkmənistan Xalq Məsləhətinin sədri Qurbanqulu Berdiməhəmmədov Füzuli şəhərinə səfər ediblər. Səfər çərçivəsində qonaq şəhərin işğal zamanı dağıdılmış əraziləri ilə tanış olub və Füzuli şəhərinin Baş planı barədə məlumatlandırılıb.

Ağdam, Füzuli və Xocavənd rayonlarında Azərbaycan Prezidentinin xüsusi nümayəndəsi Emin Hüseynov türkmən nümayəndə heyətinə 30 illik işğal dövründə Füzuli şəhərində törədilmiş dağıntılar, mədəni və şəhər infrastrukturlarına qarşı vandalizm aktları, eləcə də işğaldan sonra həyata keçirilən bərpa və yenidənqurma işləri barədə ətraflı məlumat verib.

Vaxtilə sıx məskunlaşmış və çiçəklənən Füzuli şəhəri Ermənistan silahlı qüvvələrinin işğalı zamanı tamamilə dağıdılıb və talan edilib. Azad olunmasından sonra Füzuli şəhərinin Baş planı hazırlanaraq Prezident İlham Əliyev tərəfindən təsdiqlənib və 2021-ci ildə ictimaiyyətə təqdim olunub.

Baş plana əsasən:
• Füzuli şəhərinin ümumi sahəsi təxminən 1942 hektar təşkil edir;
• 2040-cı ilə qədər 50 min nəfərin şəhərdə yaşaması nəzərdə tutulur;
• Şəhərdə İşğal və Zəfər muzeyləri, Füzuli Memorial Kompleksi, Kurmanqazı adına Yaradıcılıq Mərkəzi, xəstəxana, Şəhər Parkı, uşaq bağçaları və məktəblər kimi sosial obyektlər inşa olunacaq;
• Bütün infrastruktur “ağıllı şəhər” konsepsiyasına uyğun qurulacaq;
• Şəhərin inzibati mərkəzi 12 hektardan çox sahəni əhatə edəcək və 3 funksional hissəyə bölünəcək.

Füzuli, Qarabağ və Şərqi Zəngəzur iqtisadi rayonlarının nəqliyyat arteriyalarının kəsişməsində yerləşməsi ilə strateji əhəmiyyət daşıyır və yaxın illərdə regionun əsas şəhərlərindən birinə çevrilməsi planlaşdırılır.

Səfər zamanı türkmən nümayəndə heyəti həm tarixi dağıntılarla tanış olub, həm də regionda aparılan genişmiqyaslı bərpa və quruculuq işlərinin gedişini yerində izləyib.