ABŞ-ın keçmiş prezidenti Co Bayden Donald Trampın rəhbərlik etdiyi administrasiyanı hüququn aliliyinə və vətəndaş hüquqlarına qarşı hücumlarda ittiham edib. Cümə axşamı Çikaqoda yerləşən Milli Vəkillər Assosiasiyasında çıxış edən Bayden, ölkədə baş verən son siyasi proseslərə dair narahatlığını açıq şəkildə ifadə edib.

Təxminən 20 dəqiqə davam edən nitqində Bayden 1100 nəfərlik, əsasən qaradərili hüquqşünaslardan ibarət auditoriya qarşısında çıxış edərək, Trampın adını çəkməsə də, hədəfinin kim olduğu aydın olub.

“Reallığı gözardı etmək olmaz. Bunlar qaranlıq günlərdir,” – deyə Bayden bildirib.

Keçmiş prezident administrasiyanı demokratik dəyərlərə qarşı təhlükə adlandırıb və ABŞ tarixindəki hazırkı siyasi mərhələni “qəddar icra qərarları”, “əsas azadlıqların geri alınması” və “illərdir formalaşmış hüquqi presedentlərin pozulması” ilə xarakterizə edib.

“Bu administrasiya tarix yazmaq əvəzinə onu silmək istəyir. Ədaləti, bərabərliyi silmək istəyir. Bu, şişirtmə deyil. Bu, faktdır,” – deyə Bayden vurğulayıb.

Co Bayden çıxışında Tramp administrasiyasını həmçinin həqiqəti manipulyasiya etmək cəhdində və Konqresin icra hakimiyyətinə qarşı lazımi nəzarəti təmin etməməsində ittiham edib.

“Əziz dostlarım, bu administrasiyanın acı reallığı ilə üzləşməliyik. Bu, mənim administrasiyam dövründə əldə etdiyimiz bütün irəliləyişləri aradan qaldırmaq üçün çalışır,” – deyə Bayden əlavə edib.

Bundan əlavə, Bayden Tramp administrasiyasını qanuni şəkildə ölkədə yaşayan immiqrantlara qarşı sərt tədbirlər görməkdə, o cümlədən onların qandallanaraq aparılmasında, eləcə də hüquq firmalarına və media qurumlarına təzyiqlər göstərməkdə günahlandırıb.

Bu çıxış, Baydenin vəzifədən getdikdən sonra Trampa qarşı səsləndirdiyi ən sərt və açıq ittihamlardan biri kimi qiymətləndirilir.