Quba rayonunun Qəçrəş kəndində yerləşən “Asma körpü” istirahət mərkəzinin fəaliyyəti yanğın təhlükəsizliyi qaydalarının kobud şəkildə pozulması səbəbindən dayandırılıb. Bu barədə Fövqəladə Hallar Nazirliyi (FHN) məlumat yayıb.

Dövlət Yanğın Nəzarəti Xidməti tərəfindən aparılan yoxlama zamanı obyektin insan həyatı, sağlamlığı, ətraf mühit və dövlət əmlakı üçün birbaşa təhlükə yaradan çoxsaylı nöqsanlara yol verdiyi müəyyən edilib. Aşkarlanan çatışmazlıqlar arasında bunlar var:
• avtomatik yanğınxəbərverici siqnalizasiya qurğusunun olmaması;
• mətbəxdə propan qaz balonundan istifadə;
• elektrik təsərrüfatının norma və qaydalara uyğun quraşdırılmaması;
• ilkin yanğınsöndürmə vasitələrinin olmaması;
• taxta konstruksiyaların odadavamlı məhlulla işlənməməsi;
• obyektin fəaliyyəti üçün Dövlət Yanğın Nəzarəti Xidməti ilə razılaşmanın aparılmaması;
• daşınmaz əmlakın icbari sığortalanmaması.

FHN bildirib ki, mövcud vəziyyət yanğın baş verəcəyi təqdirdə onun sürətlə yayılaraq ciddi fəsadlara səbəb olacağı ehtimalını artırır. Bu səbəbdən “Asma körpü” istirahət mərkəzinin fəaliyyəti dayandırılması barədə qərar qəbul edilib və sənəd obyektin nümayəndəsinə təqdim olunub.