Yaxın vaxtlarda Ermənistan və Azərbaycan arasında yolların açılması məqsədilə işçi qrup yaradılacaq. Bu barədə hökumət iclasından sonra jurnalistlərə Ermənistanın ərazi idarəetmə və infrastruktur naziri David Xudatyan məlumat verib.

Nazirin sözlərinə görə, işçi qruplarının yaradılması üçün uzun gözləməyə ehtiyac olmayacaq. Xudatyan, Ermənistanı Azərbaycan vasitəsilə Naxçıvanla birləşdirəcək yolun idarəetmə mexanizminə dair suallara cavab olaraq bildirib ki, texniki detallar işçi qrupunun fəaliyyətindən sonra açıqlanacaq.

O vurğulayıb ki, yolların açılmasına dair sənəddə dörd əsas prinsip – Ermənistanın suverenliyi, yurisdiksiyası, ərazi bütövlüyü və qarşılıqlılıq – aydın şəkildə müəyyən edilib və bu prinsiplər layihənin həyata keçirilməsində əsas olacaq.

Nazir qeyd edib ki, sərhəd rejiminin formatı, keçid məntəqələrinin təşkili və giriş-çıxış qaydaları işçi qrup səviyyəsində müzakirə olunacaq. Bu məsələlərin demarkasiya prosesi ilə birbaşa əlaqəli olduğunu deyən Xudatyan, Kirantsda aparılan işlərin və əvvəlki təcrübənin, prosesin davamlı və sülh yolu ilə həll olunacağına ümid verdiyini bildirib.

O əlavə edib ki, Ermənistan və Azərbaycan arasında siyasi razılaşma mövcuddur və demarkasiya prosesi davam etdiriləcək. ABŞ-la imzalanması planlaşdırılan ikitərəfli memorandumun da yol kommunikasiyasının inkişafını nəzərdə tutduğunu, lakin konkret tarix müəyyən edilmədiyini qeyd edib.