Ermənistanın baş naziri Nikol Paşinyan Azərbaycanla münasibətlərdə anklavlar məsələsinə dair mövqeyini açıqlayıb. O, xalqa müraciətində son günlər tez-tez səslənən “Azərbaycanın nəzarətində olan Ermənistan torpaqlarının taleyi necə olacaq?” sualına cavab verib.

Paşinyan bildirib ki, tərəflər 1991-ci il Almata Bəyanatı əsasında sərhədlərin toxunulmazlığını və ərazi bütövlüyünü qəbul ediblər:

“Bu o deməkdir ki, Ermənistan və Azərbaycanın əraziləri keçmiş sovet respublikalarının sərhədləri ilə müəyyənləşir. Bu məsələlər delimitasiya və demarkasiya prosesində həll olunmalıdır.”

Baş nazir vurğulayıb ki, müzakirələrdə yeni sülh məntiqi işləyir:

“Azərbaycanın nəzarətində olan Ermənistan ərazilərindən danışarkən biz Ermənistanın nəzarətində olan Azərbaycan ərazilərini də qəbul etməliyik. Həll yalnız qarşılıqlı və ədalətli sərhədlərin müəyyən edilməsi prosesi çərçivəsində mümkündür.”

Paşinyan etiraf edib ki, bu mövqenin bəziləri üçün ağır qəbul oluna biləcəyini anlayır:

“Amma məhz bu, yeni sülh məntiqidir. Biz reallığa və regiona fərqli baxmalı, yenidən qiymətləndirməliyik.”