Azərbaycan Prezidenti İlham Əliyev Rusiyanın hava hücumundan müdafiə sistemi tərəfindən ölkənin mülki təyyarəsinin vurulmasını kəskin şəkildə pisləyib. Dövlət başçısı bu barədə “Əl-Ərəbiyyə” telekanalına müsahibəsində danışıb.

Prezident bildirib ki, hadisə Azərbaycanda böyük məyusluq və təəssüf doğurub:

“Əvvəla, təyyarəyə heç vaxt atəş açılmamalı idi. Rusiya hava limanlarına dron hücumları baş verəndə onlar xüsusi rejim elan edirlər. Bu rejim rus dilində ‘kavyor’ adlanır. Dron hücumu zamanı bütün təyyarələrə xəbərdarlıq göndərilir və onlar geri qayıdır. Təyyarə qəzaya düşməzdən iki həftə əvvəl digər reysimiz də oxşar vəziyyətlə üzləşmiş, ona vaxtında xəbərdarlıq verilmiş və geri dönmüşdü. Bu dəfə isə siqnal verilmədi. Təyyarə vurulandan sonra xəbərdarlıq göndərildi. Bu isə sadəcə araşdırmanı çaşdırmaq üçün atılmış addım idi”.

Əliyev qeyd edib ki, təyyarəyə iki dəfə atəş açılıb. Yalnız pilotların peşəkarlığı nəticəsində fövqəladə eniş mümkün olub:

“Xoşbəxtlikdən, təyyarə Rusiyada yox, Qazaxıstanda eniş etdi. Enişdən sonra qəza baş verdi. Bəzi sərnişinlər sağ qaldı, ifadə verənlər var. Gövdəyə daxil olan qəlpələrdən yaralanan iki nəfər də var. Mən dərhal hadisə yerinə heyət göndərdim. Orada hər şey lentə alındı, internetdə də tapa bilərsiniz. Təyyarənin gövdəsində çoxsaylı qəlpə dəlikləri var idi. Bu, Rusiya hava hücumundan müdafiə sistemi tərəfindən vurulduğunu sübut edir”.

Prezident Əliyev yekunda baş verənləri “faciəvi bir səhv” adlandırıb və vurğulayıb ki, belə hadisənin təkrarlanmaması üçün məsuliyyət Rusiyanın üzərinə düşür.