Sentyabrın 2-də Xankəndidə uzun illər qondarma rejimin əsas simvolu hesab edilən və “Xarici İşlər Nazirliyi” adı altında fəaliyyət göstərmiş binanın söküntüsünə start verilib.

Söküntü işlərinin məhz bu günə – 2 sentyabra təsadüf etməsi xüsusi siyasi və rəmzi məna daşıyır. Çünki həmin tarix uzun müddət Azərbaycanın işğal altında olmuş ərazilərində separatçı rejimin elan olunduğu gün kimi qeyd edilirdi.

Qeyd edək ki, bu bina işğal dövründə xarici ermənipərəst siyasətçilərin qəbul olunduğu, işğal altındakı ərazilərə qanunsuz vizaların və xarici jurnalistlər üçün akkreditasiyaların verildiyi məkan idi. Hətta hazırda Bakıda hərbi cinayətlərə görə məhkəmə qarşısına çıxarılan Babayan və digərləri bu binada oturaraq Azərbaycanın suverenliyinə qarşı bəyanatlar verirdilər.

Binanın sökülməsi yalnız simvolik məna daşımır, həm də şəhərsalma baxımından əhəmiyyətlidir. Belə ki, memarlıq baxımından yöndəmsiz olan bu tikili Xankəndidə həyata keçirilən müasir urban planlaşdırmasına uyğun gəlmirdi. Onun yerində yeni layihələr çərçivəsində şəhərin memarlıq simasına uyğun quruculuq işlərinin aparılması nəzərdə tutulur.

Beləliklə, qondarma rejimin “XİN” binasının sökülməsi Azərbaycanın Qarabağda suverenliyinin bərqərar olunmasının növbəti real göstəricilərindən biri kimi qiymətləndirilir.