Ukrayna Silahlı Qüvvələrinin tərkibində Azərbaycan Hərbi Hava Qüvvələrinə məxsus olmuş MiQ-29 qırıcısının fotoları yayılıb. Hərbi bloqçuların Telegram və X (keçmiş Twitter) platformalarında paylaşdıqları görüntülərdə bir nəfərlik, Azərbaycan aviasiyasına xas göy-boz və bənövşəyi-boz kamuflyaj naxışlı MiQ-29 yer alır.

Məlumata görə, eyni modeldən olan ən azı bir neçə təyyarə Kiyevə təhvil verilsə də, indiyə qədər onların mövcudluğunu təsdiqləyən vizual material təqdim olunmamışdı.

Azərbaycan 2007-ci ildə Ukraynadan təxminən 15 ədəd MiQ-29 qırıcısı almış, 2017-ci ildən etibarən isə Lvov Aviasiya Təmiri Zavodunda onların modernləşdirilməsi istiqamətində işlər aparılmışdı. Ekspertlər bildirirlər ki, yayılan foto çox güman, 2022-ci ilin yanvarında təmir üçün Ukraynaya göndərilən MiQ-29-lardan birinə məxsusdur.

Rusiya Federasiyasının 2022-ci ilin martında Lvovdakı aviasiya zavodunu hədəfə alması zamanı orada Azərbaycan Hərbi Hava Qüvvələrinin üç təyyarəsi olduğu bildirilirdi. Analitiklər ehtimal edirlər ki, yayılan fotodakı qırıcı həmin zərbədən salamat qalan təyyarələrdən biridir.

Baş verənlər, Azərbaycan mənşəli aviasiya texnikasının Ukrayna müharibəsində istifadəsinə dair yeni müzakirələrə səbəb olub.