Ermənistan Milli Assambleyasının sədri Alen Simonyan Azərbaycan-Ermənistan münasibətlərinə dair yeni açıqlamalar verib. O bildirib ki, iki ölkə arasında sülh sazişi imzalandıqdan dərhal sonra xalqlar arasında ticarət və ünsiyyətin bərpa olunması qaçılmazdır.

Simonyanın sözlərinə görə, hələ də qarşılıqlı həssaslıqlar mövcud olsa da, bu prosesin zamanla aradan qalxacağına inanır:

“Ermənilərin əksəriyyəti azərbaycanlı sərhədçinin üzünü görmək istəmir və bu, pisdir, çünki biz qonşuyuq. Zamanla bu da aradan qalxacaq. Eyni ermənilər və azərbaycanlılar Moskvada birlikdə biznes qururlar, dostluq edirlər, bir-birlərinin ad gününə gedirlər”.

Parlament sədri ən prioritet məsələ kimi kommunikasiyaların açılmasını göstərib:

“Ən vacib məsələ kommunikasiyaların mümkün qədər tez açılmasıdır. Sülh sazişindən cəmi beş dəqiqə sonra Ermənistan və Azərbaycan vətəndaşları ticarət aparmağa, müxtəlif formalarda ünsiyyət qurmağa başlayacaqlar. Bu, qaçılmazdır”.

Alen Simonyan vurğulayıb ki, qarşılıqlı ticarət gələcəkdə hər iki ölkənin bazarlarında öz əksini tapacaq:

“Ermənilər və azərbaycanlılar bir-birilə ticarət edəcəklər, bizim vahid erməni-azərbaycan əmtəə bazarımız olacaq. Mağazalarımızda Azərbaycan məhsulları, Bakıda və digər şəhərlərdə isə erməni məhsulları olacaq. Bu, qaçılmazdır”.