Bakı, 26 sentyabr – Milli Məclisin parlamentlərarası əlaqələr üzrə işçi qruplarının rəhbərləri və beynəlxalq parlament təşkilatlarında Azərbaycan nümayəndə heyətlərinin başçıları 27 sentyabr – Anım Günü ilə bağlı həmkarlarına müraciət ünvanlayıblar.

Milli Məclisin Mətbuat və ictimaiyyətlə əlaqələr şöbəsinin məlumatına görə, sənəddə ötən əsrin 90-cı illərinin əvvəllərində Ermənistanın təcavüzkarlıq siyasəti nəticəsində Azərbaycan ərazisinin 20 faizinin işğal olunduğu, etnik təmizləmə və soyqırımı aktlarının həyata keçirildiyi qeyd olunub.

Müraciətdə vurğulanıb ki, 2020-ci il sentyabrın 27-də Ermənistan silahlı qüvvələrinin genişmiqyaslı hücumundan sonra Azərbaycan BMT Nizamnaməsinin verdiyi özünümüdafiə hüququndan istifadə edərək əks-hücum əməliyyatına başlayıb. Prezident İlham Əliyevin rəhbərliyi ilə 44 gün davam edən Vətən müharibəsi nəticəsində Azərbaycanın beynəlxalq miqyasda tanınmış əraziləri işğaldan azad edilib, ölkənin ərazi bütövlüyü bərpa olunub.

Deputatların müraciətində həmçinin qeyd olunub ki, hərbi əməliyyatlar dövründə Ermənistanın müharibə cinayətləri və insanlıq əleyhinə əməllərinə baxmayaraq, Azərbaycan Ordusu beynəlxalq humanitar hüquqa sadiq qalıb və yalnız hərbi hədəfləri vurub.

Sənəddə 2023-cü il sentyabrın 19-20-də həyata keçirilən antiterror tədbirlərindən sonra Qarabağda separatçı rejimin fəaliyyətinə son qoyulduğu və Azərbaycanın suverenliyinin tam bərpa edildiyi də diqqətə çatdırılıb. Hazırda azad olunmuş ərazilərdə bərpa işlərinin aparıldığı, məcburi köçkünlərin öz yurdlarına qayıtdığı bildirilib.

Deputatlar eyni zamanda Azərbaycanın Ermənistanla münasibətlərin normallaşması üçün irəli sürdüyü 5 baza prinsipini xatırladaraq, sülh gündəliyinə sadiqlik nümayiş etdirdiyini vurğulayıblar. Bu çərçivədə ABŞ Prezidenti Donald Trampın dəvəti ilə Azərbaycan Prezidenti və Ermənistan Baş nazirinin Vaşinqtonda görüşməsi və sülh sazişi layihəsinin paraflanması regionda münaqişəyə birdəfəlik son qoymaq üçün əlverişli zəmin kimi dəyərləndirilib.

Müraciətdə “Beynəlxalq sülh və rifah üçün Tramp marşrutu” layihəsinin də qitələri birləşdirən mühüm nəqliyyat bağlantısına çevriləcəyi, yekun sülh sazişinin imzalanmasının isə Cənubi Qafqazda uzunmüddətli sabitlik və əməkdaşlığa yol açacağına inam ifadə olunub.