Baş Prokurorluq orqanlarına qulluğa qəbulla bağlı elan olunmuş müsabiqə üzrə test imtahanı 10 oktyabr 2025-ci il tarixində keçiriləcək.

Baş Prokurorluğun Mətbuat xidmətindən verilən məlumata görə, imtahan Dövlət İmtahan Mərkəzi ilə birgə təşkil ediləcək və həmin gün saat 10:00-dan başlayaraq 3 saat müddətində Dövlət İmtahan Mərkəzinin Bakı şəhəri, Binəqədi rayonu, S.S. Axundov küçəsi 108 ünvanında yerləşən Elektron imtahanlar korpusunda keçiriləcək.

Namizədlərə bildirilib ki, qanunvericiliyə əsasən test imtahanında iştirak ödənişlidir. Ödənişin həyata keçirilməsi üçün qeydiyyat 3 oktyabr saat 09:00-dan 7 oktyabr saat 23:59-dək Dövlət İmtahan Mərkəzinin rəsmi internet səhifəsində (link) açıq olacaq.

Namizədlər qeydiyyat prosesi başa çatdıqdan sonra “İmtahana buraxılış vərəqəsi”ni DİM-in saytında fəaliyyət göstərən “Elektron imtahanlara buraxılış vərəqələri və nəticələrin çapı” xidməti vasitəsilə (link) çap etməlidirlər.

İmtahan günü iştirakçıların buraxılış rejiminin vaxtında həyata keçirilməsi üçün imtahana 1 saat əvvəl gəlmələri, həmçinin şəxsiyyət vəsiqəsinin əsli ilə yanaşı “İmtahana buraxılış vərəqəsi”ni təqdim etmələri tələb olunur.

Test imtahanı kompüter vasitəsilə elektron qaydada keçiriləcək. İmtahanın sonunda hər bir namizəd nəticəsini kompüter ekranında dərhal görəcək, eyni zamanda nəticə namizədin şəxsi kabinetinə yüklənəcək.

İmtahanın keçirilməsi qaydaları barədə ətraflı məlumat “Yaddaş kitabçası”nda əks olunub. Namizədlərin həm bu kitabça, həm də elektron test imtahanında kompüterdən istifadəyə dair Təlimatla əvvəlcədən tanış olmaları vacibdir.