Qazaxıstan hökuməti ölkədə daha üç atom elektrik stansiyası (AES) inşa etməyi nəzərdə tutur. Bu barədə ölkənin Atom Enerjisi Agentliyinin sədri Əlmasadam Satkaliyev açıqlama verib.

Onun sözlərinə görə, iki stansiyanın Almatı vilayətində, daha birinin isə Qərbi Qazaxıstanda, Xəzər dənizinin sahilində tikilməsi planlaşdırılır:

“Atom Sənayesinin İnkişafı üzrə Dövlət Komissiyasının iclasında ikinci sahə kimi Almatı vilayətinin Jambil rayonu müəyyən edilib. Biz tenderin bütün iştirakçıları ilə danışıqlar aparırıq. Yekun qərar hələ verilməyib. Amma dəfələrlə demişik ki, Çin şirkətinə üstünlük veriləcək. Bununla belə, hələlik heç bir qərar yoxdur”, – Satkaliyev deyib.

Agentlik rəhbəri əlavə edib ki, Qərbi Qazaxıstan və Xəzər sahili kiçik və orta gücə malik reaktorların yerləşdirilməsi üçün potensial məkan kimi nəzərdən keçirilir:
“Yer hələ dəqiq müəyyən edilməyib. Yaxın vaxtlarda araşdırmalar aparılacaq.”