Dövlət Gömrük Komitəsinin Biləsuvar Gömrük İdarəsinin əməkdaşları və bir qrup şəxs qaçaqmalçılıq və digər cinayət əməllərində ittiham olunaraq məsuliyyətə cəlb olunublar.

Baş Prokurorluq və Dövlət Gömrük Komitəsinin birgə məlumatına görə, aparılan istintaq zamanı müəyyən edilib ki, Biləsuvar Gömrük İdarəsinin 1-ci şöbəsinin inspektoru Vüsal Hüseynov və həmin şöbəyə təhkim olunmuş “Azərterminalkompleks” Birliyinin instruktor-kinoloqu Asif Hacımuradov, Etibar Hatəmli və İran vətəndaşı Jafar Rezeyan ilə qabaqcadan əlbir olaraq qanunsuz fəaliyyət göstəriblər.

Onların İrandan ümumilikdə 400 min manat dəyərində dövlət qeydiyyatından keçməyən dərman preparatlarını və aksiz markasız tütün məmulatlarını gömrük nəzarətindən kənar keçirərək ölkə ərazisinə gətirdiklərinə dair əsaslı şübhələr müəyyən olunub. Qeyd olunur ki, dərman vasitələrinin tərkibində güclü təsir edən və psixotrop maddələr də olub.

Toplanmış sübutlar əsasında V.Hüseynov, A.Hacımuradov, J.Rezeyan və E.Hatəmliyə qaçaqmalçılıq, psixotrop maddələrin dövriyyəsi, aksiz markasız malların idxalı və vəzifə səlahiyyətlərindən sui-istifadə ilə bağlı Azərbaycan Cinayət Məcəlləsinin bir sıra maddələri üzrə ittiham elan edilib.

Məhkəmənin qərarı ilə Vüsal Hüseynov, Asif Hacımuradov və Etibar Hatəmli barəsində həbs qətimkan tədbiri seçilib. Jafar Rezeyan barədə isə həbs olmayan digər qətimkan tədbiri tətbiq olunub.

Hazırda cinayət işi üzrə istintaq və əməliyyat-axtarış tədbirləri davam etdirilir.