Xəzər dənizi vasitəsilə Azərbaycana 510 kiloqramdan artıq narkotik vasitə keçirilməsinin qarşısı alınıb.

Bu barədə Dövlət Sərhəd Xidmətindən (DSX) məlumat verilib.

Bildirilib ki, Xəzər dənizində keçirilmiş əməliyyat tədbirləri nəticəsində külli miqdarda narkotik vasitəni İrandan Azərbaycana keçirməyə cəhd göstərən mütəşəkkil cinayətkar qrupun üzvləri saxlanılıblar.

Sahil Mühafizəsinin sahil nəzarəti bölmələri və texniki müşahidə məntəqələrinin qarşılıqlı fəaliyyəti nəticəsində Xəzər dənizində naməlum üzmə vasitəsi aşkar edilib. Hədəfin saxlanılması məqsədilə sərhəd gəmiləri tərəfindən təqibetmə əməliyyatı başlanıb, sahil xətti boyunca nəzarət gücləndirilib.

Azərbaycan ərazi sularında həyata keçirilmiş əməliyyat-qoşun tədbirləri zamanı “Dövlət sərhədi haqqında” qanunun tələblərinə uyğun olaraq xəbərdarlıq atəşi açılıb və üzmə vasitəsi Xaçmaz rayonu ərazisində sahilə yan almağa məcbur edilib.

İlkin dindirmə zamanı saxlanılan şəxslərin İran İslam Respublikası vətəndaşları — 1979-cu il təvəllüdlü Atacani Tahir Xaləd, 1987-ci il təvəllüdlü Məxtumi Sadiq Ərazqurban və 1989-cu il təvəllüdlü Qangerme Omid Çalce olduqları müəyyən edilib.

Sərhəd pozucularından götürülən “Garmin” markalı GPS cihazının yaddaşına baxış zamanı onların İran ərazisindən çıxaraq Türkmənistan sularından keçməklə Azərbaycan istiqamətinə hərəkət etdikləri müəyyən olunub.

Saxlanılmış “Layner” tipli üzmə vasitəsində və hadisə yerində aparılmış axtarış nəticəsində ümumi çəkisi 509 kiloqram 800 qram narkotik vasitə aşkarlanıb.

Əməliyyatın davamı olaraq, hadisə yerində “Niva” markalı avtomobildə olan 4 Azərbaycan vətəndaşı da şübhəli şəxs qismində saxlanılıb.

Fakt üzrə Baş Prokurorluqla birgə istintaq-əməliyyat tədbirləri davam etdirilir.