Madaqaskar prezidenti Andri Rajuelina ölkədə davam edən genişmiqyaslı etirazlar fonunda ölkəni tərk edib.

Bu barədə məlumatı müxalifət lideri Siteni Randrianasoloniaiko və bir neçə rəsmi şəxs oktyabrın 13-də “Reuters” agentliyinə açıqlayıb.

Məlumata görə, prezident oktyabrın 12-də ordunun bəzi bölmələrinin etirazçılara qoşulmasından sonra ölkədən gedib.

“Biz prezident administrasiyasının əməkdaşları ilə əlaqə saxladıq və onlar onun ölkəni tərk etdiyini təsdiqlədilər,” – deyə Randrianasoloniaiko bildirib.

Müxalifət liderinin sözlərinə görə, hazırda Rajuelinanın yeri məlum deyil.

Prezident isə oktyabrın 13-ü gecə “Facebook” vasitəsilə xalqa müraciətində “həyatını qorumaq üçün təhlükəsiz yerə getməyə məcbur qaldığını” deyib. O, harada olduğunu açıqlamayıb, lakin “Madaqaskarın məhv olmasına icazə verməyəcəyini” vurğulayıb.

“Reuters” hərbi mənbələrə istinadla yazır ki, Rajuelina Fransa hərbi təyyarəsi ilə ölkədən çıxarılıb. Fransız radiosu “RFI” isə onun Fransa prezidenti Emmanuel Makronla razılaşma əldə etdiyini xəbər verib.

Misirdə keçirilən Sülh Sammitində jurnalistlərin sualını cavablandıran Makron, Fransanın Rajuelinanın qaçışına yardım edib-etmədiyini təsdiqləməyib, amma bildirib ki, “Madaqaskarda konstitusion nizam qorunmalıdır.”
O əlavə edib ki, Fransa ölkədəki gənclərin narazılığını anlayır, lakin “bu narazılıqların hərbi qruplar tərəfindən istismar edilməməsi vacibdir.”

Madaqaskarda etirazlar sentyabrın 25-də su və enerji çatışmazlığı səbəbindən başlayıb, daha sonra isə korrupsiya, idarəetmədəki problemlər və sosial ədalətsizlik kimi məsələlərə qarşı geniş xalq üsyanına çevrilib.

Bu hadisə son həftələrdə Nepaldan sonra “Z nəsli etirazları” nəticəsində bir hökumətin devrilməsi ilə müşahidə olunan ikinci hal kimi qiymətləndirilir.