Nazirlər Kabineti “İşğaldan azad edilmiş ərazilərdə istehsal fəaliyyəti ilə məşğul olan sahibkarlara kommunal xidmətlərdən (elektrik enerjisi, təbii qaz, su təchizatı və tullantı sularının axıdılması xidməti) istifadəyə görə maliyyə yardımının ödənilməsi qaydası”na dəyişiklik edib.

Bu barədə Milli Məclisin deputatı Vüqar Bayramov məlumat verib.

Deputat bildirib ki, yeni qərara əsasən, kommunal xidmətlər göstərən dövlət müəssisələrinin siyahısına İqtisadiyyat Nazirliyinin tabeliyində olan İqtisadi Zonaların İnkişafı Agentliyi də əlavə edilib.

“Agentlik işğaldan azad edilmiş ərazilərdə yaradılmış sənaye parklarında bu fəaliyyəti həyata keçirəcək. Digər mühüm dəyişiklik agentliyin maliyyə yardımının verilməsinə başlaması ilə bağlıdır,” – deyə Vüqar Bayramov qeyd edib.

Onun sözlərinə görə, qərara əsasən, agentlik Qarabağ və Şərqi Zəngəzur iqtisadi rayonlarında yaradılmış sənaye parklarında istehsal fəaliyyəti ilə məşğul olan sahibkarlara kommunal xidmətlər üzrə maliyyə yardımını 2023-cü il yanvarın 1-dən etibarən hesablayaraq ödəyəcək. Bu, sahibkarların əvvəlki dövrlərdə ödənilmiş kommunal xidmətlərə görə də dəstək alacağı deməkdir.

Deputat əlavə edib ki, Prezidentin imzaladığı fərmana əsasən, işğaldan azad edilmiş ərazilərdə istehsal fəaliyyəti ilə məşğul olan sahibkarlara kommunal xidmətlərə görə ödənilmiş vəsaitin 20 faizi məbləğində maliyyə yardımı verilir.

Bu vəsait aylıq qaydada hesablanaraq sahibkarın hesabına köçürülür və 10 il müddətinə şamil olunur.

“Nazirlər Kabinetinin bu qərarı ilə güzəştlərdən istifadə miqyası daha da genişləndirilib. Məsələn, sahibkar ay ərzində 1000 manatlıq kommunal ödəniş edərsə, onun 200 manatı dövlət büdcəsi hesabına geri qaytarılacaq,” – deputat bildirib.

Vüqar Bayramovun sözlərinə görə, bu güzəştlərin məqsədi işğaldan azad edilmiş ərazilərə daha çox sərmayənin cəlb edilməsi və Qarabağ ilə Şərqi Zəngəzurda fəaliyyət göstərən sahibkarların daha güclü şəkildə dəstəklənməsidir.