Daxili İşlər Nazirliyi (DİN) qanunsuz saxlanılan odlu silahlarla bağlı növbəti dəfə vətəndaşlara müraciət edib.

Nazirliyin çağırışında bildirilib ki, qanunsuz odlu silahların saxlanılması və daşınması cəmiyyət üçün ciddi təhlükə yaradır:

“Belə silahlar istənilən vaxt qeyri-qanuni məqsədlə istifadə edilərək insan həyatına, sağlamlığına zərər vura və ağır cinayətlərə səbəb ola bilər. Buna görə də daxili işlər orqanları əhali arasında profilaktik izahat işlərini, silahların aşkarlanması və yığılması üçün planlı əməliyyat-axtarış tədbirlərini davam etdirir”.

Məlumata görə, 2025-ci ilin 9 ayı ərzində polis əməkdaşları tərəfindən 4181 ədəd odlu silah aşkar olunaraq götürülüb. Onlardan 1126-sı avtomat, 263-ü tapança, 2792-si isə tüfəng olub.

Eyni zamanda, 3536 odlu silah vətəndaşlar tərəfindən könüllü şəkildə təhvil verilib, keçirilən əməliyyat tədbirləri nəticəsində isə əlavə 645 silah aşkarlanaraq götürülüb.

Nazirlik vətəndaşlara müraciət edərək, qanunsuz yollarla əldə etdikləri və ya tapdıqları silah-sursatı könüllü şəkildə yaxınlıqdakı polis orqanlarına təhvil verməyə çağırıb:

“Könüllü olaraq polisə təqdim edilən silaha görə vətəndaş məsuliyyətə cəlb edilmir. Bu halda həmin şəxs həm özünü, həm də ailəsini təhlükədən və qanunla müəyyən olunmuş ağır məsuliyyətdən qorumuş olur”.

DİN müraciətin sonunda qeyd edib ki, bu təşəbbüsə dəstək verən vətəndaşların hər biri cəmiyyətin təhlükəsizliyinə töhfə verir və onların dəstəyi yüksək qiymətləndirilir.