Rejissor Suada Qarayevanın çəkdiyi “Məhsəti” adlı qısametrajlı film Mədəniyyət Nazirliyi və Azərbaycan Kino Agentliyinin təşkil etdiyi “Baku Cinema Breeze 25” film festivalının proqramından çıxarılıb.

Suada Qarayevanın məsələ ilə bağlı sosial şəbəkədə paylaşım edərək üzr istədiyi bildirilir. Rejissor açıqlamasında qeyd edib ki, onun filmə dair paylaşımı tənqid məqsədi daşımayıb və şəxsi, emosional düşüncələrdən irəli gəlib:

“Azərbaycan vətəndaşı olaraq ölkəmə, xalqımıza və mədəni dəyərlərimizə hər zaman böyük hörmət və dərin bağlılıqla yanaşmışam. Qısametrajlı filmimlə bağlı son paylaşımım heç vaxt tənqid məqsədi daşımayıb, sadəcə emosional, şəxsi bir düşüncə idi. Sözlərimin niyyətimdən fərqli şəkildə başa düşülməsindən səmimi qəlbdən təəssüf edirəm. Bundan təsirlənmiş və ya incimiş ola biləcək hər kəsdən üzr istəyirəm”.

Mədəniyyət Nazirliyinin nəzdində fəaliyyət göstərən Bədii Şura filmlə bağlı yaydığı açıqlamada bildirib ki, ekran işində ədəbiyyat irsinə hörmətsizlik nümayiş olunur, Azərbaycanın klassik ədəbi-mədəni tarixində xüsusi yerə malik olan Məhsəti Gəncəvi obrazının bədii təqdimatında ciddi təhriflərə yol verilib. Açıqlamada həmçinin etik və normativ çərçivələrə riayət edilmədiyi, obrazın mənəvi kimliyi ilə təqdim edilən səhnələr arasında uyğunsuzluqların müşahidə olunduğu vurğulanıb.

Film ətrafında gedən müzakirələr və tənqidlər fonunda Suada Qarayevanın festivaldan çıxarılma qərarına etirazla bağlı paylaşımını sosial şəbəkə hesabından sildiyi qeyd olunur.

Qeyd edək ki, Suada Qarayevə sabiq mədəniyyət naziri Əbülfəs Qarayevin qızıdır.