ABŞ Prezidenti Donald Tramp Azərbaycan və Ermənistanla bağlı növbəti açıqlama verib. Dekabrın 29-da Floridadakı iqamətgahında İsrailin Baş naziri Benyamin Netanyahu ilə görüşü zamanı Tramp iki ölkə arasında uzunmüddətli münaqişəyə son qoyulmasında rol oynadığını iddia edib.

Onun sözlərinə görə, Azərbaycan və Ermənistanı ABŞ-la ticarətdən məhrum etmək və bu ölkələrdən idxal olunan məhsullara 200 faiz tarif tətbiq etməklə hədələyib. Tramp bildirib ki, bu bəyanatdan bir gün sonra hər iki tərəf razılaşmanı imzalamaq üçün əlaqə saxlayıb.

“Bunu dediyim səhəri gün zəng etdilər ki, gəlirik imzalamağa. Onlar 35 il döyüşmüşdülər. Heç kim buna son qoya bilmirdi. Hətta Putin zəng edib dedi ki, 10 ildir bunu bitirməyə çalışırdım, sən necə bacardın?” – deyə Tramp qeyd edib.

Görüş zamanı Benyamin Netanyahu Trampın Azərbaycanın adını düzgün tələffüz etməsinə ironik münasibət bildirib. Qeyd olunur ki, Tramp daha əvvəl çıxışlarında Azərbaycanın adını səhv tələffüz edib, Ermənistanı isə bir neçə dəfə Albaniya ilə qarışdırıb.

Xatırladaq ki, Tramp bu ilin aprel ayında digər ölkələrlə yanaşı Azərbaycan və Ermənistana da 10 faiz tarif tətbiq olunacağını elan etmişdi. Yerli iqtisadçılar isə Azərbaycanın ABŞ-yə ixracının çox məhdud olduğunu və bu qərarın ölkə iqtisadiyyatına ciddi təsir göstərməyəcəyini bildirmişdilər.

Qeyd edək ki, avqustun 8-də Vaşinqtonda Azərbaycan və Ermənistan arasında sülh sazişinin mətni paraflanıb, Trampın iştirakı ilə tərəflər arasında bir sıra sənədlər imzalanıb.