Fevralın 23-də Bakıda Azərbaycan Respublikası ilə İran İslam Respublikası arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının 17-ci iclası keçirilib.

İclas Azərbaycan Respublikası Baş nazirinin müavini, Komissiyanın Azərbaycan tərəfindən həmsədri Şahin Mustafayev və İran İslam Respublikasının yol və şəhərsalma naziri, Komissiyanın İran tərəfindən həmsədri Fərzanə Sadeqin sədrliyi ilə baş tutub. Tədbirdə hər iki ölkənin aidiyyəti qurumlarının nümayəndələri iştirak ediblər.

Görüşdə Azərbaycan və İran arasında münasibətlərin ortaq tarixi, mədəni və dini dəyərlər, dostluq və qonşuluq prinsipləri əsasında qurulduğu vurğulanıb. Bildirilib ki, ikitərəfli əlaqələrin inkişafı iki ölkə rəhbərlərinin siyasi iradəsinə əsaslanır və bütün sahələri əhatə edir.

İclasda ticarət-iqtisadi əlaqələr, nəqliyyat, energetika, su və humanitar sahələr üzrə əməkdaşlığın hazırkı vəziyyəti və perspektivləri müzakirə olunub.

Şahin Mustafayev çıxışında qeyd edib ki, Ağbənd–Kəlalə avtomobil körpüsünün tikintisi başa çatıb və sərhəd-gömrük infrastrukturunun tamamlanmasından sonra körpünün istismara verilməsi planlaşdırılır. Layihənin Şərqi Zəngəzur iqtisadi rayonunu Naxçıvanla ən qısa marşrutla birləşdirəcəyi və Fars körfəzi ilə Qara dənizi əlaqələndirən avtomobil marşrutunun mühüm hissəsi olacağı bildirilib.

Bundan başqa, Şərq-Qərb və Şimal-Cənub nəqliyyat dəhlizlərinin inkişafı, regionun tranzit və logistika imkanlarının genişləndirilməsi, eləcə də Şimal-Cənub dəhlizinin əsas elementi hesab edilən Rəşt–Astara dəmir yolu xəttinin tikintisi məsələləri müzakirə olunub. Qeyd edilib ki, xəttin istifadəyə verilməsi daşımaların həcmini artıracaq və çatdırılma müddətini qısaldacaq.

İclasın yekununda həmsədrlər tərəfindən Komissiyanın nəticələrinə dair Anlaşma Memorandumu imzalanıb.