Fevralın 26-da Azərbaycan Respublikasının Prezidenti İlham Əliyev, birinci xanım Mehriban Əliyeva və ailə üzvləri Xocalı şəhərində inşa olunan Xocalı Soyqırımı Memorialının açılışında iştirak ediblər.

Dövlət başçısı Memorialın önünə əklil qoyub. Prezidentin köməkçisi Anar Ələkbərov dövlət başçısına və birinci xanıma kompleks barədə məlumat verib.

Qeyd olunub ki, Memorial Prezident İlham Əliyevin 2025-ci ilin fevralında imzaladığı Sərəncama əsasən, Xocalı faciəsi qurbanlarının xatirəsinin əbədiləşdirilməsi və tarixi həqiqətlərin gələcək nəsillərə çatdırılması məqsədilə yaradılıb. Layihə Heydər Əliyev Fondunun hazırladığı konsepsiya əsasında reallaşdırılıb.

Memorial monolit konstruksiya formasında layihələndirilib və dörd tərəfdən onu əhatə edən rəmzi əllər Xocalı sakinlərini qorumağa çalışan simvol kimi təqdim olunur. Kompleksin həyətində “Xocalıya ədalət!” kampaniyasının rəmzi olan badam ağacları əkilib.

Memorial dörd bölmədən ibarətdir. Ekspozisiya zallarında Xocalı soyqırımı qurbanlarının xatirəsi əks etdirilir, faciənin tarixi və nəticələri sənədlər, xəritələr və faktlar əsasında təqdim olunur. “Faciənin siması” instalyasiyası və digər bədii kompozisiyalar vasitəsilə 1992-ci il fevralın 25-dən 26-na keçən gecə baş verən hadisələr ziyarətçilərə çatdırılır.

Ekspozisiyada həmçinin Prezident İlham Əliyevin Xocalı həqiqətlərinin beynəlxalq səviyyədə tanıdılması istiqamətində fəaliyyəti, Heydər Əliyev Fondunun layihələri və Fondun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq kampaniyası çərçivəsində görülən işlər barədə məlumatlar yer alır.

Kompleksdə rəsmi tədbirlərin keçirilməsi üçün akt zalı da nəzərdə tutulub.

Sonda Prezident İlham Əliyev Memorialın xatirə kitabına ürək sözlərini yazıb. Dövlət başçısı, birinci xanım və ailə üzvləri daha sonra Xocalı rayon ictimaiyyətinin nümayəndələri ilə görüşüblər.