Belçika Krallığının Baş nazirinin müavini, xarici işlər, Avropa işləri və inkişaf sahəsində əməkdaşlıq naziri Maksim Prevo Azərbaycan Respublikasının xarici işlər naziri Ceyhun Bayramova telefonla zəng edib. Bu barədə Azərbaycan Xarici İşlər Nazirliyi məlumat yayıb.

Telefon danışığı zamanı Yaxın Şərqdə mövcud təhlükəsizlik vəziyyəti, Azərbaycan və Belçika arasında ikitərəfli münasibətlər, eləcə də Avropa İttifaqı çərçivəsində əməkdaşlıq perspektivləri müzakirə olunub.

Nazirlər Yaxın Şərqdə davam edən hərbi eskalasiyadan dərin narahatlıqlarını ifadə edərək, münaqişənin diplomatik yollarla həllinin vacibliyini vurğulayıblar. Belçika tərəfi İran ərazisindən Naxçıvan istiqamətinə dron hücumu ilə bağlı Azərbaycanla həmrəyliyini ifadə edib və Belçika vətəndaşlarının İrandan təxliyəsi üçün yaradılmış şəraitə görə təşəkkürünü bildirib.

Görüş zamanı Azərbaycan və Ermənistan arasında normallaşma prosesi ətrafında da fikir mübadiləsi aparılıb. Ceyhun Bayramov qarşı tərəfi regionda davamlı sülh və sabitliyin təmin edilməsi istiqamətində görülən tədbirlər barədə məlumatlandırıb.

Tərəflər Azərbaycan ilə Belçika arasında qarşılıqlı maraq doğuran sahələr üzrə əməkdaşlığın inkişafı üçün siyasi dialoqun, qarşılıqlı səfərlərin və yüksək səviyyəli təmasların əhəmiyyətini vurğulayıblar.