ABŞ-ın Ədliyyə Departamenti prezident Donald Trampın milli təhlükəsizlik məsələləri üzrə keçmiş müşaviri Con Bolton barədə cinayət işi başlayıb.

“foto.info.az” xəbər verir ki, bunu “The New York Times” yazıb.

C.Bolton bu ilin yayında işıq üzü görmüş “Hadisələrin baş verdiyi otaq” adlı kitabında məxfi məlumatları yaymaqda ittiham olunur.

Artıq kitabın nəşr edildiyi “Simon & Schuster” mətbəəsinin sahibi məsələ ilə bağlı hüquq-mühafizə orqanlarının əməkdaşlarına ifadə verib.

Qeyd edək ki, ABŞ prezidenti Donald Tramp 17 ay Ağ evdə işləmiş C.Boltonu məhkəməyə vermişdi. Ağ evin rəsmiləri bildirib ki, müəllif açıqladığı informasiyalarla bağlı hökumətdən icazə almayıb.

C.Bolton 2018-ci ilin aprelindən 2019-cu ilin sentyabrınadək prezidentin milli təhlükəsizlik məsələləri üzrə müşaviri işləyib. Lakin o, məxfi məlumatları yaymaq barədə ittihamları rədd edir. C.Bolton hesab edir ki, kitabında hazırkı prezidenti tənqid edib və həmin faktlar məxfi deyil.

“Con Bolton şəxsiyyət deyil, o, həbsxanada yatmalıdır. Mənfəət əldə etmək üçün çox gizli məlumatları açıqladı”, - D.Tramp öz bloqunda yazmışdı.