Ötən gün Rusiyanın xarici işlər naziri Sergey Lavrov ermənistanlı həmkarı Ararat Mirzoyanı qəbul edib. Görüşdə Azərbaycan-Ermənistan sərhədindəki mübahisəli məsələlərə toxunulub.

Sergey Lavrov Azərbaycanda saxlanılan erməni hərbçilərin qaytarılmasına dair Bakı ilə bir neçə dəfə danışıqlar aparıldığını bildirib.

“Müxtəlif səviyyələrdə azərbaycanlı həmkarlarımıza erməni hərbçilərin azad olunması siqnalını ötürürük. Bu məsələyə hər cür səy göstərəcəyik, amma son qərar bizdən asılı deyil. Rusiya Azərbaycanla Ermənistan arasında delimitasiya və demarkasiya prosesinin keçirilməsinə yardımçı olacağını təsdiqləyir. Bundan başqa, regional kommunikasiyaların açılması səylərinə də dəstək verməyə hazırıq”, - deyə Rusiyanı XİN başçısı söyləyib.

Sabiq diplomat Fikrət Sadıqov Lavrovun erməni diversantların azad olunması barədə çağırışına münasibət bildirib.

Bu barədə Modern.az-a açıqlama verən politoloqun fikrincə, Rusiyanın xarici işlər naziri Sergey Lavrov Mirzoyana xoş gəlmək üçün belə fikirlər səsləndirib.

“Bu, artıq onların öz işləridir. Söhbət real vəziyyətdən gedirsə, Ermənistanın Azərbaycan torpaqlarında saxlanılan hərbçiləri əsir deyil, terrorçulardır. Onların həbsi 10 noyabr bəyanatından sonra baş verib. Təbii ki, təxribatçılar öz cəzalarını çəkməli və törətdiyi əməllərə görə cavab verməlidir. Ondan sonra dövlətimiz bu məsələyə qayıda və müzakirə edə bilər. Əvvəlcə cəzalarını çəkməlidilər. Rusiya bunu yaxşı dərk etməlidir və bir sıra məsələlərdə həm Azərbaycanın strateji tərəfdaşı, həm də ATƏT-in Minsk Qrupunun həmsədri kimi nəticə çıxarmalıdır.

Rusiya Ermənistanla da tərəfdaşdır, onu dəstəkləyən ölkədir. Saxlanılan həbçilərlə bağlı həm diplomatik müstəvidə, həm də görüşlər zamanı məsələ qaldırırlar. Amma bu, heç də o demək deyil ki, biz hüququ tapdalayıb, kiminsə sözünə baxmalıyıq. Bizim cavabımız tutarlı və əsalıdır”, - deyə F.Sadıqov sözlərinə əlavə edib.