İranın atdığı bu addım Azərbaycanla İran arasında yaşanan münasibətlərin ziddiyyətli bir nöqtəyə gəldiyinin bariz nümunəsidir.

Bu sözləri Axar.az-a beynəlxalq əlaqələr üzrə mərakeşli professor İssam Laaroussi dünən İranın Azərbaycanın daha çox hərbi təchizat funksiyasını yerinə yetirən təyyarələrinin Naxçıvana uçuşuna qadağa qoyması ilə bağlı yayılan xəbərlərə münasibət bildirərkən deyib.

Ekspertin fikrincə, bu hərbi ritorikanın səbəbi hər iki ölkənin geostrateji maraqlarının toqquşmasıdır:

“Tehran geostrateji maraqlarına görə də azad edilmiş Azərbaycan sərhədlərinin yaxınlığında hərbi təlimlərə başladı. İranın suverenliyinə hörmətlə yanaşan Bakı rəhbərliyi bu addımı İranın təbii hüququ olaraq görsə də, birmənalı qarşılamadı”.

Mütəxəssisin sözlərinə görə, İranın son dönəmlərdə Azərbaycana qarşı düşmən mövqeyi sərgiləməsinin başqa bir səbəbi rəsmi Tehranın Azərbaycan-Türkiyə koalisiyasına münasibətidir:

“Rəsmi Ankaranın Bakıya bu cür yanaşması tarixi bir dəstəkdir. İran isə bu dəstəkdən narahatdır. Tehran bu hərbi-siyasi addımları bölgədəki siyasi və hərbi qütbləşmənin quruluşunda böyük bir hadisədir”, – ekspert bildirib.