MDB ölkələrinin liderlərinin Sankt-Peterburqda qeyri-formal sammiti əsasən, Rusiya ilə Qərb arasında yaşanan böhran fonunda keçirilir. Rusiya prezidentinin dəvəti ilə keçirilən bu sammitdə regional məsələlər, iqtisadi və siyasi proseslər müzakirə edilsə də əsasən, Putin Qərbə MDB məkanın da əsas söz sahibi Rusiyanın olduğunu nümayiş etdirməyə çalışacaq.
Bunu politoloq Məhəmməd Əsədullazadə deyib.
Onun fikrincə, bir neçə gün bundan əvvəl, məhz Rusiya prezidenti ABŞ və NATO -ya ultimatum verərək MDB məkanına genişlənməmək və bu ölkələrdə hərbi fəaliyyət göstərməməyi tələb edib. Həmçinin MDB ölkələrini NATO ilə hərbi tərəfdaşlılıq etməmək mesajını verib. Belə olan təqdirdə belə bir sammit Moskvanın regionda siyasi-hərbi vəziyyəti gərginləşdirməyə xidmət edir: “Göründüyü kimi, Rusiya bununla ABŞ-ı öz təsir dairəsini elan edib. MDB-nin keçirilən bu sammiti Rusiyanın heç də tərəfdaş olmadığını, bununla öz qonşularına qarşı aqressiv siyasətinin göstəricidir. Qeyd edim ki, MDB-nin perspektivi yoxdur. Otuz il ərzində Rusiya üzv ölkələrin bir necəsinə qarşı hərbi təcavüzə yol verib, üzv ölkəri ilə tərəfdaş kimi əməkdaşlıq etməyib.
Putin çalışır ki, MDB yeni bir layihələr çərçivəsində inkişaf etdirsin. Belarusla ittifaq buna nümunədir. Rusiya gələn ildən yeni bir siyasət ortaya qoyacaq. Bu qonşu ölkələrə qarşı təzyiq siyasəti olacaq. Azərbaycanın Türkiyə ilə siyasi-hərbi İttifaqı gücləndirdikcə Rusiyanın hu siyasəti Azərbaycan üçün effektli olmayacaq. Ümumiyyətlə, Rusiya MDB məkanında yeni bir güclə Türkiyə ilə qarşılaşacaq. Türkiyə Cənubi Qafqazda və Mərkəzi Asiyada Rusiyanın mövqelərini zəiflətmək üçün strateji siyasət aparacaq”.
M.Əsədullazadə onu da bildirib ki, əgər, Ukrayna və Rusiya arasında müharibə başlayacaqsa, MDB ölkələri Rusiyadan uzaqlaşacaq. Ümumiyyətlə, Qarabağ münaqişəsinin bitməsi, Ermənistanla Azərbaycan arasında sülh müqaviləsi bağalnarasa Rusiyanın MDB planı fiaskoya uğrayacaq.