Ümummilli Liderimiz Heydər Əliyevin "Siz Azərbaycanın bu günü və gələcəyisiniz. Sizin üzərinizə böyük vəzifə düşür, bu vəzifələr gələcəkdə daha da böyük olacaqdır, siz Müstəqil Azərbaycanın XXI əsrdə yaradanlarısınız, quranlarısınız, inkişaf etdirənlərisiniz. Biz Müstəqil Azərbaycanın taleyini gələcəkdə sizə etibar edəcəyik, sizə tapşıracağıq" deməsi əbəs yerə deyildi.

Bu gün də ölkəmizdə gənclərin, tələbələrin iştirakı ilə keçirilən tədbirlər, layihələr və.s ümummilli lider Heydər Əliyevin kəlamını doğrultmağa təkan verir. Çox möhtəşəm, demək olar ki, heç bir mənfi xüsusiyyəti olmayan layihələr ərsəyə gəlir. Belə layihələr tələbələrə bilik, bacarıq və özünəxidmət vərdişlərini aşılayır. Lahiyələr ilə birlikdə müəyyən tədbirlərin keçirilməsini nəzərdə tuta bilərik.

Məsələn, mən fəal tələblərdən biriyəm və müəyyən tədbirlərdə, layihələrdə iştirak etmişəm. Bu layihələrin bir çoxunda əməyim olub, həqiqətən də zəhmət çəkmişəm. Bu mənim üçün çox əladır, çünki mən gələcəkdə müəyyən işə, peşəyə sahibləndikdə həmin tədbirlərdə, layihələrdə dərk etdiyim məsuliyyətlərə, bilik və bacarıqlara artıq bələd olacam. Məsələn, mən Bakı Slavyan Universitetində baş tutan Gənc müəllimlərin 3-cü şəbəkələşmə forumunda iştirak etmişəm. Orada mənim vəzifəm həmin tədbirə gələn müəllimləri kompyuterdə qeydiyyatını aparmaq idi. Çox məsuliyyətli, çox zəhmət tələb edən bir iş idi, ancaq mən onun öhdəsindən gələ bildim və təşəkkürnamə aldım.

Heç uzağa getməyim, axırıncı iştirak etdiyim layihə “XXI Əsr Təhsil Mərkəzi” İctimai Birliyinin Azərbaycan Respublikası Elm və Təhsil Nazirliyinin maliyyə dəstəyi ilə həyata keçirdiyi “Təhsilalanlar arasında ictimai fəallığın dəstəklənməsi” layihəsi idi. Layihədə müxtəlif universitetlərdən tələbələr millət vəkilləri, tanınmış elm, ictimai, siyasi xadimlərlə söhbət aparırdılar. Bu layihədə mən də çox həvəslə iştirak etdim, hətta iki dəfə. Orada dəyərli deputatlarımızdan biri olan Ramil Həsən ilə söhbətimiz oldu. Çox tövsiylər, məsləhətlər verdi. Bu mənim üçün bir qazanc oldu. Ramil Həsəndən sonra akademik Rasim Əliquliyev ilə söhbətimiz oldu. Bir sözlə, çox möhtəşəm anlar yaşandı. Demək istədiyim odur ki, tələbələrin, gənclərin bu cür layihələrdə, tədbirlərdə iştirak etməsi çox əladır, vacibdir. Təbii ki, hər hansı bacarığa, biliyə sahib olmaq üçün bir qədər zəhmət çəkmək lazımdır. Sonradan isə uğurlar özü adamın ayağına gəlir.

Zəngin təbii resurslara və əlverişli coğrafi məkana malik olan Azərbaycanın iqtisadi sahədə əməkdaşlığına geniş imkan yaradan amillərdən biri təbii ki, elmi, intellektual potensialıdır. Dövlətimizin başçısı İlham Əliyev bugünkü uğurlarımızda elmin rolunu xüsusi vurğulayaraq bildirir ki, tarixi ənənələrlə müasirliyin ahəngdar vəhdətində davamlı yeniləşən ölkəmizdə elmin prioritetləri dünya elminin hazırkı inkişaf tendensiyalarına uyğun olub, milli strateji maraqların konseptual şəkildə həllinə yönəlmişdir. Qloballaşmanın böyük vüsət aldığı müasir dövrdə elmin əhəmiyyətinin gündən-günə artması və yüksək texnologiya sahələrinin sürətlə genişlənməsi çevik innovasiya fəallığı və yeni yanaşmalar tələb edir. Bir sözlə, mövcud şərait müasir gəncliyin intellektual potensialının tam üzə çıxarılması üçün əlverişli zəmin hazırlanmasını ön palana çıxarır. Bu, gəncliyin potensialından səmərəli istifadənin aktuallığının təsdiqidir.

Yaxın gələcəkdə ölkəmiz daha da inkişaf edəcək, ölkəmizin bacarıqlı, savadlı tələbələri, şagirdləri, gəncləri yetişəcək. Bu cür layihələrin, tədbirlərin Azərbaycanda keçirilməsinin lehinəyəm və bu cür layihələrin, tədbirlərin daha çox keçirilməsini, bununla da gənclərin, tələbələrin ictimai fəallıq mövzusunda və daha çox mövzuda uğurlar qazanmaqlarını arzulayıram.

Rəvan Məmmədli
Bakı Slavyan Universitetinin Filologiya fakültəsinin 1-ci kurs tələbəsi

Yazı “XXI Əsr Təhsil Mərkəzi ” İctimai Birliyinin Azərbaycan Respublikasının Elm və Təhsil Nazirliyinin maliyyə dəstəyi ilə “Təhsilalanlar arasında ictimai fəallığın dəstəklənməsi” layihəsi çərçivəsində hazırlanıb