Azərbaycan Milli Antidopinq Agentliyi ötən ili zərərlə başa vurub.

Azərbaycan Milli Antidopinq Agentliyi (AMADA) 2022-ci ili 310 min manat zərərlə başa vurub. Halbuki, Agentlik 2021-ci ildən 597 min manat mənfəətlə çıxmışdı.

Ötən il AMADA-nın əməliyyat gəlirləri 3,235 milyon manat (əvvəlki ilə nisbətən 2,8 % çox), əməliyyat xərcləri 3,589 milyon manat (35,8 % çox), kapital ehtiyatları hesabına gəlirləri isə 44 min manat (2,1 dəfə az) təşkil edib.

Bu il yanvarın 1-nə AMADA-nın aktivləri 948 min manat olub ki, bu da illik müqayisədə 27,7 % azdır. Hesabat dövründə Agentliyin öhdəlikləri 30,5 % artaraq 514 min manata çatıb, balans kapitalı isə 2,1 dəfə azalaraq 434 min manata düşüb.

Xatırladaq ki, AMADA 2016-cı ildə yaradılıb. Agentlik Azərbaycanda ədalətli və dürüst idman çıxışlarına və nəticələrinə nail olunması, yarış və yarışdan kənar müddətdə idmançılar, köməkçi heyət, inzibatçılar, rəsmilər və digər maraqlı tərəflərin dopinqə qarşı sıfır tolerantlıq münasibətinin təşviqi və bütün səviyyələrdə təhlükəsiz, ədalətli və inklüziv bir idman mühitinə nail olunması üçün dövlət siyasətini həyata keçirir.