Moskvada Azərbaycanın xalq artisti Emin Ağalarova məxsus “Crocus City Hall” ticarət mərkəzində atışma olub. Bu barədə telegram kanalları məlumat yayıb.

Ticarət mərkəzinə daxil olan silahlı və maskalı şəxslər içəridə olanlara atəş açıb, Son məlumata görə, atışma nəticəsində 40 nəfər həlak olub, 100-dən çox insan yaralanıb.

Hadisə ilə bağlı operativ qərargah yaradılıb. Mərkəzin yerləşdiyi Krasnoqorsk administrasiyasından APA-nın Moskva müxbirinə verilən məlumata görə, bütün qüvvə və vasitələr hadisə yerinə yönəldirilib, zərərçəkənlər barədə məlumat dəqiqləşdirilir.

Hadisə zamanı qumbara və yanan maddə atıldığından güclü yanğın başlayıb.

Konsert salonunun tavanı qismən çöküb.
Müxtəlif mənbələr hücumda 3 və ya 5 nəfər silahlı şəxsin iştirak etdiyini bildirirlər.

Rosqvardiyanın xüsusi təyinatlı qüvvələri hadisə yerinə cəlb olunub.

Moskva vilayətinin Səhiyyə Nazirliyinin mətbuat xidmətindən verilən məlumata görə, 30-dan çox regional və 20 təcili tibbi yardım briqadası əraziyə göndərilib.

“112” teleqram kanalının məlumatına görə, hücum zamanı 40 nəfər həlak olub, daha 130 nəfər isə yaralanıb.