Abzas Media-nın işi üzrə həbs edilmiş araşdırmaçı jurnalist Hafiz Babalı bir müddət əvvəl damarların varikoz genişlənməsi ilə bağlı tibbi yardım göstərilməməsindən ombudsman aparatına şikayət vermişdi. Onun aldığı cavabda deyilir ki, Ədliyyə Nazirliyinin Tibb İdarəsi ombudsmanın bununla bağlı sualına cavab verib.

Ədliyyə Nazirliyi Tibb İdarəsinin cavabında belə deyilir: "14.12.2023-cü il tarixdə Bakı istintaq təcridxanasına qəbul olunarkən ilkin tibbi baxışdan keçirilən zaman miopiya ve astiqmatizm, arterial hpertenziya və sağ aşağı ətraf venalarının varikoz xəstəliyindən əziyyət çəkdiyiniz məlum olmuşdur. Klinik və instrumental müayinələrdən (USM, EKO) keçirilmiş, qanın ümumi ve biokimyəvi analizləri aparılmış, şikayətlərinizə uyğun zəruri derman preparatları ilə təmin edilmisiniz. Penitensiar müəssisələrdə saxlandığınız sonrakı müddət ərzində səhhətiniz həkim nəzarətində olmuş, 02.10.2024-cü il tarixində Tibb-sanitar hissəsində damar cərrahı tərəfindən müayinə olunmuş, hazırda cərrahiyyə əməliyyatına ehtiyac olmadığı bildirilərək müvafiq təyinat verilmişdir".

Beləliklə, Ombudsman Aparatı və Ədliyyə Nazirliyinin Baş Tibb İdarəsi üçüncü qrup gözdən əlil olan Babalının səhhətində ciddi problemlərin olduğunu təsdiq edib.

Lakin Babalının yaxınları bildiriblər ki, İstintaq Təcridxanasında ona heç bir müalicə verilməyib. Babalının işi üzrə istintaq artıq yekunlaşıb və məhkəməyə göndərilib.

Müdafiə tərəfi həm onun həbsdə saxlanılmasının hüquqi cəhətdən məqsədəuyğun olmaması nöqteyi-nəzərdən, həm də humanitar baxımdan onun barəsində qətimkan tədbirinin dəyişdirilməsi haqqında vəsatət qaldırmağı planlaşdırır.

Qeyd edək ki, Babalı Abzas Media-nın işi ilə əlaqədar həbsdədir. O, ona qarşı irəli sürülən qaçaqmalçılıq və digər ittihamları təkzib edir.

Hüquq müdafiəçiləri onu siyasi məhbus kimi tanıyıblar, beynəlxalq təşkilatlar Azərbaycan hakimiyyətini Abzas Media-ya qarşı işin bütün fiqurantlarını azad etməyə çağırıblar.