Prezident Administrasiyasının sabiq rəhbəri, Azərbaycan Milli Elmlər Akademiyasının keçmiş prezidenti Ramiz Mehdiyevə məxsus dəbdəbəli villa satışa çıxarılıb. Tbilisi prospektində yerləşən və 36 sot torpaq sahəsini əhatə edən bu lüks əmlak, əmlak saytlarından birində 8 milyon ABŞ dolları qiyməti ilə təqdim olunub.

Məlumata görə, bu villa Mehdiyevin yüksək vəzifədə çalışdığı dövrlərdə tikdirdiyi çoxsaylı mülklərdən yalnız biridir. Villanın satışa çıxarılması isə ictimaiyyətdə müxtəlif suallar doğurub. Bəzi ehtimallara görə, bu addım Mehdiyevlər ailəsinin maliyyə vəziyyətində yaranan çətinliklərlə bağlı ola bilər. Lakin bu barədə rəsmi və dəqiq məlumat yoxdur.

Azərbaycan reallığında yüksək vəzifəli şəxslərin işdən uzaqlaşdırıldıqdan sonra illərlə qurduqları biznes imperiyalarının zəiflədiyi müşahidə olunur. Bu baxımdan Ramiz Mehdiyevin ailəsinin də oxşar taleyi yaşadığı ehtimal olunur.

Qeyd edək ki, Ramiz Mehdiyevin mülkiyyəti yalnız bu villa ilə məhdudlaşmır. KİV-də yayılan məlumatlara görə, o, “Bank BTB” də daxil olmaqla, bir sıra böyük biznes strukturlarına da sahib olub. Bu səbəbdən Tbilisi prospektindəki villanın satışı, Mehdiyevin ümumi biznes strategiyasında dəyişikliklərin göstəricisi kimi də dəyərləndirilə bilər.

Hazırda əmlakın satışı ictimaiyyətin və medianın diqqət mərkəzindədir.

Daha ətraflı araşdırmalar davam edir.