Tofiq Yaqublunun aclıq aksiyası səbəbindən səhhətində yaranmış ciddi problemlərlə bağlı həkim ekspert, professor Adil Qeybulla ciddi xəbərdarlıq edib. O, Yaqublunun keçirdiyi aclıq aksiyasının artıq hər hansı tibbi kateqoriyaya sığmadığını və birbaşa “ölüm aclığı” kimi qiymətləndirilməli olduğunu bildirib.

Professorun sözlərinə görə, aclıq müddəti 40 günə yaxınlaşır və bu zaman ərzində yalnız içməli su qəbul edən yaşlı orqanizmdə həyati funksiyaların pozulması qaçılmazdır. Qeybulla qeyd edir ki, Azərbaycanda içməli suların mineral tərkibi beynəlxalq standartlara cavab vermədiyindən, bu vəziyyət orqanizmə əlavə zərbə vurur.

Hal-hazırda Tofiq Yaqublunun bədənində “autofaqiya” – yəni orqanizmin öz toxumalarını parçalayaraq enerji əldə etmə prosesi – genişlənib. Bu, həm fiziki, həm də psixoloji təsirlər yaradır: əzələ zəifliyi, hərəkət məhdudiyyəti, apatiya, əsəbilik, davranış nəzarətinin itməsi, hətta hallüsinasiya və aqressiya halları müşahidə olunur.

Yaqublunun vəkillərinə “ölümün sədalarını eşidirəm” deməsi həkimə görə, onun psixoloji durumunun ağırlaşmasının bariz sübutudur. Mayın 6-da keçirilən apellyasiya iclasında onun davranışı bir çoxlarında normal görüntü yaratsa da, Adil Qeybullanın fikrincə, bu əslində ruhsal və koqnitiv dəyişikliklərin əlamətidir.

Aclığın son mərhələsində immun sistemin tam zəiflədiyini vurğulayan Qeybulla bildirir ki, bu zaman ən sadə infeksiya belə ölümə səbəb ola bilər. Yaqublunun bronxial astma kimi yanaşı xəstəlikləri də vəziyyəti daha da təhlükəli edir. O, istənilən respirator infeksiyanın ağır nəticələr doğura biləcəyini bildirir.

Professorun fikrincə, aclıq dayandırılsa belə, orqanizmin fiziki və psixoloji bərpası uzun zaman tələb edir və bu prosesin nəticəsi hələ də sual altındadır.

Adil Qeybulla sonda xəbərdarlıq edir: “Vəziyyət son dərəcə kritikdir. Tibbi müdaxilə və təcili müalicə indi başlayarsa belə, nəticə hələ də qeyri-müəyyəndir.”