Mayın 21-də Bakı Hərbi Məhkəməsində Müdafiə Nazirliyinin tabeliyindəki hərbi hissənin vəsaitlərini mənimsəməyə görə təqsirləndirilən sabiq maliyyə xidmət rəisi, kapitan Vahid Novruzlunun cinayət işi üzrə sonuncu məhkəmə iclası keçirilib. Prosesə hakim Fikrət Əliyev sədrlik edib.

Məhkəmənin hökmü ilə Vahid Novruzlu 11 il müddətinə azadlıqdan məhrum edilib.

Ona qarşı Cinayət Məcəlləsinin 179.4-cü (xüsusilə külli miqdarda mənimsəmə), 313-cü (vəzifə saxtakarlığı) və 333.4-cü (hərbi hissəni və ya xidmət yerini özbaşına tərk etmə) maddələri ilə ittiham irəli sürülüb.

İttiham aktına əsasən, Vahid Novruzlu Müdafiə Nazirliyində müxtəlif hərbi hissələrdə maliyyə sahəsində məsul vəzifələrdə çalışıb. Əsgərlərin və digər heyətin əməkhaqqı, vergi ödənişləri və maliyyə hesabatlarının hazırlanması onun səlahiyyətində olub. Lakin o, tamah məqsədi ilə Müdafiə Nazirliyinin Maliyyə və Büdcə İdarəsinin sabiq rəisi, general-mayor Nizami Məmmədovla əlbir olaraq saxta məlumatlar əsasında ümumilikdə 1 milyon 230 min manata yaxın vəsaiti müxtəlif plastik kart hesablarına köçürərək mənimsəyib.

İstintaq Dövlət Təhlükəsizliyi Xidmətinin İstintaq Baş İdarəsi tərəfindən aparılıb və ötən ilin iyun ayında Vahid Novruzlu barəsində həbs qətimkan tədbiri seçilib.

Məhkəmədə ifadə verən təqsirləndirilən şəxs özünü qismən təqsirli bildiyini, hərəkətlərinin bir qismini yuxarı rütbəli şəxslərin göstərişi ilə həyata keçirdiyini deyib.