Avstriyanın Qrats şəhərində yerləşən orta məktəblərdən birində baş verən silahlı hücum ölkədə dərin sarsıntıya səbəb olub. Rəsmi məlumatlara görə, hadisə nəticəsində azı 10 nəfər həyatını itirib, 30-a yaxın şəxs isə müxtəlif dərəcəli bədən xəsarətləri alıb.

Ölkənin kansleri Kristian Stoker baş verən faciəni “milli fəlakət” adlandıraraq, Avstriyada üç günlük matəm elan olunduğunu bildirib.

“Bu gün baş verənlər milli faciədir. Bu hadisə hamımıza təsir etdi. Üç günlük milli matəm zamanı bütün Avstriya qurbanların xatirəsini ehtiramla yad edəcək, bütün dövlət qurumlarının binalarında bayraqlar endiriləcək. Sabah saat 10:00-da bütün ölkə boyu bir dəqiqəlik sükut elan olunacaq”, – deyə kansler bəyan edib.

Hadisənin təfərrüatları hələ ki tam açıqlanmayıb. Hücumun motivi, hücum edən şəxsin kimliyi və onun terrorçu qruplaşmalarla əlaqəsi olub-olmadığı ilə bağlı rəsmi strukturlar araşdırma aparır.

Avstriya hakimiyyəti və təhlükəsizlik orqanları ölkə boyu təhlükəsizlik tədbirlərini gücləndirib. Qrats şəhərində bütün məktəblərdə dərslər müvəqqəti olaraq dayandırılıb, valideynlərə uşaqlarını evdə saxlamaq tövsiyə olunub.

Hadisə Avropada məktəblərə qarşı təhlükənin artdığı dövrdə baş verdiyi üçün geniş beynəlxalq rezonansa səbəb olub. Bir sıra Avropa liderləri Avstriya xalqına başsağlığı verib və terrora qarşı birgə mübarizə çağırışları səsləndiriblər.