Baş Prokurorluğun iyunun 13-də yaydığı rəsmi məlumata əsasən, “Uber Azərbaycan” kimi tanınan, hazırda isə fəaliyyətini “Ridetech” MMC adı altında davam etdirən şirkət qanunsuz taksi fəaliyyəti və fərdi məlumatların qorunması ilə bağlı tələbləri pozduğuna görə cərimələnib.

Məlumatda bildirilir ki, Azərbaycan Yerüstü Nəqliyyat Agentliyindən daxil olmuş müraciət əsasında Baş Prokurorluğun Cinayət təqibindən kənar icraatlar idarəsində araşdırma aparılıb. Araşdırma nəticəsində şirkətin direktoru Müşfiq Həsənovun müvafiq şəhadətnaməsi olmayan sürücülərlə bağlı informasiya sisteminə həqiqəti əks etdirməyən məlumatlar daxil etdiyi müəyyən edilib. Bu isə həmin şəxslərin qanunsuz olaraq taksi fəaliyyəti ilə məşğul olmasına şərait yaradıb.

Qanun pozuntularına görə MMC və onun direktoru İnzibati Xətalar Məcəlləsinin 326-2.2-ci maddəsinə əsasən inzibati məsuliyyətə cəlb olunub. Nəticədə, Müşfiq Həsənov 5 min manat, “Ridetech” MMC isə 20 min manat məbləğində cərimələnib.

Hazırda məsələ ilə bağlı əlavə tədbirlərin görülüb-görülməyəcəyi barədə məlumat verilməyib.